ممبئی: (ویب ڈیسک) سابق بھارتی آل راؤنڈر راجر بنی کو سارو گنگولی کی جگہ بورڈ آف کرکٹ کنٹرول انڈیا (بی سی سی آئی) کا نیا صدر بنا دیا گیا۔
بھارتی میڈیا رپورٹس کے مطابق بنی نے ہندوستانی کرکٹ ٹیم کے سابق کپتان سارو گنگولی سے باگ ڈور سنبھالی، بنی کو ممبئی کے تاج ہوٹل میں کرکٹ بورڈ کی سالانہ جنرل میٹنگ میں بی سی سی آئی کے سربراہ کے طور پر مقرر کیا گیا۔
بی سی سی آئی کے سکریٹری جے شاہ، نائب صدر راجیو شکلا، خزانچی ارون سنگھ دھومل اور سابق صدر گنگولی اس تقریب میں موجود تھے۔
بنی نے 1979-1987 کے درمیان ہندوستان کے لیے 27 ٹیسٹ اور 72 ون ڈے کھیلے ہیں اور بی سی سی آئی کے صدر کے طور پر مقرر ہونے سے قبل وہ کرناٹک اسٹیٹ کرکٹ ایسوسی ایشن کے صدر تھے۔
وزیر داخلہ امیت شاہ کے بیٹے جے شاہ بی سی سی آئی کے سکریٹری کے عہدے پر برقرار رہیں گے جبکہ گنگولی کو اکتوبر 2019 میں متفقہ طور پر بی سی سی آئی کا صدر منتخب کیا گیا تھا۔
بی سی سی آئی کے صدر کے طور پر بنی کی تقرری پر تبصرہ کرتے ہوئے سابق کرکٹر محمد اظہر الدین نے کہا وہ ایک اچھے آدمی ہیں، میں نے ان کے ساتھ کافی کرکٹ کھیلی ہے اور ہماری یادیں اچھی ہیں، آئی سی سی چیئرمین کے عہدے پر آج کوئی بات چیت نہیں ہوئی، بورڈ بعد میں فیصلہ کرے گا۔
