مشی گن: (ویب ڈیسک) امریکا میں اپنی بڑی آنکھوں کی وجہ سے مشہور ہونے والی بلی ایک دن کی میئر بنے گی۔
غیر ملکی میڈیا رپورٹس کے مطابق ایک بلی (جنکس) جو سوشل میڈیا پر اپنی غیرمعمولی بڑی آنکھوں اور پیروں کی وجہ سے مشہور ہوئی وہ اب امریکی ریاست مشی گن کے قصبے ہیل کی ایک دن کیلئے میئر کی ذمہ داریاں سنبھالے گی۔
رپورٹس کے مطابق مشی گن کا یہ قصبہ کس کو بھی 100 ڈالر کے عوض ایک دن کے لیے میئر کے طور پر کام کرنے کا موقع فراہم کرتا ہے لہٰذاجنکس کو علاقے کا پہلاغیر انسانی میئر بننے کی اجازت دینے پر اتفاق کیا گیا ۔
اطلاعات کے مطابق جنکس کیلیفورنیا میں مالکن میا کے ساتھ رہتی ہے، انسٹاگرام پر اس بلی کا سوشل میڈیا اکاؤنٹ بھی ہے جس پر4 لاکھ سے زائد فالورز بھی ہیں۔
رپورٹس کے مطابق جنکس کی مالکن میا میں نے ٹوئٹر پر ایک مذاق کرتے ہوئے لکھا تھا کہ جنکس صدر کے لیے انتخاب لڑیں گے۔
ان کا کہنا تھا کہ میں نے پہلے جانوروں کو میئر بنتے دیکھا تھا اس لیے میں نے ایک ٹوئٹ کی جس میں نے پوچھا کہ جنکس کو میئر کیسے بنایا جائے اور پھر کسی نے مشی گن کا ذکر کرتے ہوئے بتایا کہ آپ ایک دن کے لیے ہیل کے میئر بننے کے لیے ادائیگی کر سکتے ہیں۔
غیر ملکی میڈیا رپورٹس کے مطابق جنکس 24 اپریل کو میئر کے طور پر حلف اٹھائیں گی۔ اور وہ اس دن کے لیے میئر کے طور پر کام کریں گی۔

نیویارک: (ویب ڈیسک) اکثر افراد فلموں کے کافی شوقین ہوتے ہیں اور ہر فلم کو دیکھنے کیلئے سنیما کا رخ کرتے ہیں ۔
آج ہم آپ کو ایک ایسے نوجوان کے بارے میں بتانے جارہے ہیں جس نے ایک ہی فلم کو ایک دو بار نہیں بلکہ 292 بار سنیما میں دیکھ کر نیا گنیرز ورلڈ ریکارڈ قائم کردیا۔
غیر ملکی میڈیا رپورٹس کے مطابق امریکی ریاست فلوریڈا سے تعلق رکھنے والے رامیرو الانس نامی نوجوان نے مارول سیریز کی حالیہ ریلیز ہونے والے فلم ‘اسپائیڈرمین، نو وے ہوم’ 292 بار سنیما میں دیکھ کر عالمی ریکارڈ قائم کیا۔
گنیز ورلڈ ریکارڈز کے حکام کے مطابق امریکی نوجوان نے اسپائیڈرمین، نو وے ہوم 16 دسمبر 2021 سے 15 مارچ 2022 کے درمیان 292 بار سنیما میں جاکر دیکھی جبکہ اس دوران ان کے 720 گھنٹوں کا وقت لگا۔
رپورٹس کے مطابق رامیرو مارول سیریز کی فلموں کے اتنی دیوانے ہیں کہ اس سے قبل 2019 میں انہوں نے ‘ایونجرز اینڈ گیمز’ 191 دیکھ کر عالمی ریکارڈ بنایا تھا لیکن ان کا یہ ریکارڈ 2021 میں توڑ دیا گیا تھا۔
گنیز ورلڈ ریکارڈز کے مطابق رامیرو الانس نے تقریباً دن میں 5 بار اسپائیڈرمین، نو وے ہوم دیکھی جبکہ فلم کے ٹکٹوں پر خرچ کی گئی رقم کا صحیح اندازہ نہیں لگایا لیکن ایک خیال کے مطابق انہوں نے یہ ریکارڈ بنانے کیلئے تقریبا3،400 ڈالرز یعنی (6 لاکھ سے زائد پاکستانی روپے سے زائد) خرچ کیے۔
رپورٹس کے مطابق ریکارڈ کی تصدیق کرنے کیلئے فلم کی 292 ٹکٹیں ثبوت کے طور پر فراہم کی گئیں جبکہ سنیما کے حکام سے ایک بیان لیا گیا تاکہ اس بات کی تصدیق کی جا سکے کہ رامیرو پوری فلم کو دیکھ رہا تھا۔

نئی دہلی: (ویب ڈیسک) بھارتی ریاست مہاراشٹرا میں چوروں نے بینک ’اے ٹی ایم‘ لوٹنے کا نیا طریقہ ڈھونڈ نکالا ہے تاہم انہیں واردات کے دوران ناکامی کا سامنا کرنا پڑا۔
غیرملکی خبر رساں ادارے کی رپورٹ کے مطابق مہاراشٹرا کے پونے شہر میں ملزمان نے بینک کے ’اے ٹی ایم‘ کو دھماکے سے اڑا کر رقم چرانے کی کوشش کی لیکن وہ اپنی اس کوشش میں ناکام رہے اور خالی ہاتھ لوٹ گئے۔
پولیس نے بتایا کہ چوروں نے سوچا تھا کہ اے ٹی ایم کو دھماکے سے اڑانے سے اس میں موجود ’کیش باکس‘ پھٹ کر سامنے آجائے گا لیکن اے ٹی ایم مشین مضبوط ہونے کی وجہ سے ایسا نہیں ہوا۔
مقامی پولیس کا کہنا ہے کہ ملزمان نے اے ٹی ایم کو اڑانے کے لیے دھماکا خیز مواد استعمال کیا جبکہ چوروں کے خلاف مقدمہ درج کرلیا گیا ہے اور ان کی گرفتاری کے لیے چھاپے بھی مارے جارہے ہیں، ممکنہ طور پر ملزمان جلد قانون کی گرفت میں ہوں گے۔