واشنگٹن: (ویب ڈیسک) امریکا میں کورونا دور کی بارڈر پالیسی برقرار ہے ، سپریم کورٹ نے نقل مکانی کرنیوالوں کی فوری ملک بدری کی حمایت کردی۔ خبر رساں ادارے کے مطابق عدالت نے اس حوالے سے سابق صدر ڈونلڈ ٹرمپ کے دور میں متعارف کرائی گئی تبدیلی کو مسترد کرنے سے انکار کردیا ہے۔ امریکی انتظامیہ کو ٹائٹل فورٹی ٹو اس بات کی اجازت دیتا ہے کہ ایسے ممالک جہاں سے آنیوالوں کے زریعے امریکا میں کورونا وائراس کے پھیلاؤ کا خدشہ ہو، ان تمام تارکین کو فوری طورپر ملک بدر کردیا جائے، ایسے تمام افراد کو امریکا میں سیاسی پناہ لینے کا موقع بھی نہیں دیا جاتا۔ ٹرمپ دور میں متعارف کرایا گیا یہ اقدام عبوری تھا اوراس کی مدت دسمبر میں اختتام پذیر ہورہی تھی تاہم اب اس اقدام پر امریکی سپریم کورٹ میں 19 ری پبلکن اٹارنی جرنلز نے مقدمہ دائر کیا تھا، جس پر عدالت نے درخواست پر اطمینان کا اظہار کیا ہے۔ سپریم کورٹ اب اس معاملے پر فروری میں ریاستوں کے دلائل سنے گی جس میں یہ طے کیا جائے گا کہ آیا مقامی انتظامیہ کو دوسرے ملکوں سے آنیوالے افراد سے متعلق موجودہ پالیسی میں مداخلت کرنے کا اختیار ہے یا نہیں ۔ گزشتہ 12 ماہ کے دوران تقریباً 25 لاکھ افراد کو جنوبی امریکی سرحد عبور کرنے کی کوشش کرتے ہوئے روکا گیا تھا، دو سال پہلے زیادہ تر تارکین وطن میکسیکو، ہونڈوراس، گوئٹے مالا اور ایل سلواڈور، وینزویلا، کیوبا، مشرقی یورپ سے تعلق رکھتے تھے۔

نئی دہلی : (ویب ڈیسک) بھارتی ریاست اتر پردیش میں 2020 میں قتل ہونے والے پولیس اہلکار کے قتل کا مقدمہ، تین ساتھی اہلکاروں کیخلاف درج کرلیا گیا ۔ میڈیا رپورٹس کے مطابق پولیس کا کہنا ہے کہ اتر پردیش کے میرٹھ ضلع میں تعینات تین پولیس کانسٹیبلوں کے خلاف منگل کے روز اپنے 25 سالہ ساتھی کو مارنے کے الزام میں مقدمہ درج کیا گیا۔ خیال رہے کہ یہ معاملہ 9 دسمبر 2020 کا ہے ، جب مراد آباد کے بدھی بہار کے رہنے والے 25 سالہ کانسٹیبل پون کمار کو امروہہ ضلع ، گجرولا قصبے کے علاقے رجب پور میں مبینہ طور پر اس کے تین ساتھیوں نے قتل کر دیا تھا۔ پون کمار میرٹھ میں تعینات تھے، اس کے والد منوہر سنگھ کے مطابق، تینوں ملزمان جن کی شناخت منوج کمار، سچن کمار اور راہول کمار کے طور پر کی گئی ہے ، پون کو “پارٹی میں شرکت” کے بہانے گجرولا لے گئے اور وہاں اس کو تشدد کا نشانہ بنایا ۔ ایک مقامی نے پون کے والدین کو اطلاع دی ، جنہوں نے اسے مراد آباد کے ایک میڈیکل کالج میں پہنچایا تاہم وہ جانبر نہ ہوسکے ۔ پون کے والد نے الزام لگایا کہ انہوں نے ملزم کے خلاف رجب پور تھانے میں شکایت درج کروائی تھی لیکن پولیس نے اس معاملے میں کوئی مقدمہ درج نہیں کیا۔ اہل خانہ کے کیس میں شکایت درج کرنے کے لیے عدالت میں درخواست دائر کی ،گزشتہ روز عدالت کے حکم کے بعد پولیس نے کانسٹیبل منوج، سچن اور راہول کے خلاف آئی پی سی کی دفعہ 302 کے تحت مقدمہ درج کیا ہے۔ امروہہ کے پولیس سپرنٹنڈنٹ کا کہنا ہے کہ کانسٹیبل پون کمار کی دو سال قبل موت ہو گئی تھی، ہم نے مقامی عدالت کے حکم کی بنیاد پر تین کانسٹیبلوں کے خلاف مقدمہ درج کیا ہے جس پر مزید تحقیقات جاری ہیں۔