تائ پے : (ویب ڈیسک) تائیوان نے چین کے ساتھ کشیدگی اور ملکی سلامتی کے پیش نظر 2024 سے اپنی لازمی فوجی سروس کا عرصہ تین گنا بڑھانے کا فیصلہ کرلیا۔
غیر ملکی خبر رساں ادارے کے مطابق تائیوان کی صدر سائی اِنگ وَین کی جانب سے لازمی فوجی سروس کی مدت کا دورانیہ ایک سال تک کرنے کا اعلان کیا گیا ہے جس پر عملدرآمد 2024 سے کیا جائے گا۔
رپورٹس کے مطابق تائیوان میں عام شہریوں کے لیے لازمی فوجی سروس کی مدت صرف چار ماہ ہے لیکن صدر کے اعلان کے مطابق 2024ء کے آغاز سے اس عرصے کو تین گنا کر کے اس کا دورانیہ ایک سال کر دیا جائے گا۔
اس حوالے صدر سائی انگ وین کا کہنا تھا کہ فوجی سروس سے متعلق فیصلہ غیر معمولی حد تک مشکل تھا لیکن ملکی سلامتی اور چین کی وجہ سے درپیش خطرات کے پیش نظر ناگزیر بھی تھا۔
انہوں نے مزید کہا کہ تائیوان کوئی جنگی میدان نہیں بنے گا بلکہ جب تک مضبوط رہے گا، جمہوریت کا گھر اور دنیا بھر میں آزادی کے لیے کوششیں کرتا رہے گا۔
