لاہور:(ویب ڈیسک) پاکستان تحریک انصاف کے چیئرمین اور سابق وزیراعظم عمران خان نے کہا ہے کہ آج رات مینارِ پاکستان پر ہمارا چھٹا جلسہ ہے اور میرا دل کہہ رہا ہے کہ یہ پہلے تمام ریکارڈز توڑ دے گا۔
سماجی رابطے کی ویب سائٹ ٹوئٹر پر چیئرمین پی ٹی آئی نے لکھا کہ میری لاہور میں سب کو دعوت ہے کہ نمازِ تراویح کے بعد اس تاریخی جلسے میں شریک ہوں، میں حقیقی آزادی کے اپنے ویژن پر روشنی ڈالوں گا۔
انہوں نے کہا کہ لاہور جلسے میں اپنی قوم کو بتاؤں گا کہ ہم پاکستان کو تباہی کی اس دلدل سے کیسے نکالیں گے جس میں مجرموں کے اس گروہ نے ملک کو دھکیلاہے، یہ (مجرم) لوگوں کوجلسے میں شرکت سے روکنے کیلئے ہر طرح کی رکاوٹ ڈالیں گے۔
سابق وزیر اعظم کا کہنا تھا کہ میں سب کو یاد دلانا چاہتا ہوں کہ اس سیاسی اجتماع میں شرکت آپ کا بنیادی حق ہے چنانچہ اپنا حق استعمال کیجئے اور مینارِ پاکستان کے اس تاریخی اجتماع میں شریک ہوں۔
واضح رہے کہ پاکستان تحریک انصاف کے مینار پاکستان میں ہونے والے جلسے کو ناکام بنانے کیلئے حکومت نے شہر کے مختلف راستوں کو کنٹینرز لگا کر بند کر دیا ہے۔
