علی امین گنڈاپور کو 6 روزہ جوڈیشل ریمانڈ پر جیل بھیج دیا گیا

ڈیرہ اسماعیل خان: (ویب ڈیسک) تحریک انصاف کے رہنما اور سابق وزیر علی امین گنڈاپور کو عدالت نے 6 دن کے لئے جوڈیشل ریمانڈ پر جیل بھیج دیا۔
ڈیرہ اسماعیل خان میں مجسٹریٹ ون کی عدالت میں علی امین گنڈاپور کے خلاف مقدمات کی سماعت ہوئی، جوڈیشل مجسٹریٹ نے علی امین گنڈاپور کے ڈی آئی خان میں درج دونوں مقدمات خارج کر دیئے۔
بھکر اور اسلام آباد پولیس کی جانب سے عدالت سے علی امین گنڈاپور کی حوالگی کی استدعا کی گئی جو عدالت نے مسترد کر دی۔
اس سے قبل رہنما تحریک انصاف علی امین گنڈاپور کے خلاف اسلام آباد میں دہشتگردی اور غداری کی دفعات کے تحت ایک اور مقدمہ درج کر لیا گیا۔
پی ٹی آئی رہنما کے خلاف مقدمہ تھانہ گولڑہ میں مجسٹریٹ قیصر نعیم کی مدعیت میں درج کیا گیا جس میں ان کے ساتھی اسد خان کا نام بھی شامل ہے۔
ایف آئی آر کے مطابق ملزمان نے اسلام آباد کی سوسائٹی میں اسلحے اور بندے جمع کرنے کا کہا، ملزمان نے آڈیو میں کہا کہ اگر عمران خان کو گرفتار کیا گیا تو پورے اسلام آباد پر قبضہ کر لیں گے۔
ایف آئی آر کے مطابق ملزمان نے پولیس کو بھی دھمکی دی تاکہ وہ اپنے فرائض سر انجام نہ دے سکے۔
واضح رہے کہ گزشتہ روز علی امین گنڈاپور نے وکلاء اور پولیس کے مذاکرات کے بعد پشاور ہائیکورٹ ڈیرہ اسماعیل خان بنچ کے گیٹ پر پولیس کو گرفتاری دی تھی۔