فیصل آباد: فیڈرل انویسٹی گیشن ایجنسی (ایف آئی اے) کمپوزٹ سرکل نے یونان کشنی حادثے کے مرکزی ملزم کر گرفتار کرلیا۔
تفصیلات کے مطابق غیرقانونی طریقے سے شہریوں کو یونان بھیجنے والے مرکزی ملزم عتیق بٹ کو ایف آئی اے نے گرفتار کرلیا۔
ایف آئی اے حکام کے مطابق گرفتار ملزم انسانی اسمگلنگ کے گینگ کا اہم کارندہ ہے، ملزم کے بینک اکاؤنٹ میں انسانی اسمگلنگ کے 67 لاکھ روپے ٹرانسفر ہوئے ہیں۔
ایف آئی اے حکام نے مزید بتایا کہ سانحے میں ملوث انسانی اسمگلر سے ملزم عتیق کے رابطے کے شواہد ملے، ملزم کے خلاف مقدمہ درج کرلیا گیا جبکہ ساتھیوں کی گرفتاری کے لئے چھاپے مارے جارہے ہیں۔
واضح رہے کہ یونان کے قریب بحیرہ روم میں 750 تارکین وطن پر مشتمل کشتی ڈوب گئی تھی جس کے نتیجے میں 100 سے زائد افراد جان کی بازی ہار گئے اور سیکڑوں تاحال لاپتا ہوگئے تھے۔
حادثے میں بچ جانے والوں کی جانب سے شیئر کی گئی ابتدائی معلومات کے مطابق اس کشتی پر تقریباً 400 پاکستانی، 200 مصری اور 150 شامی (جن میں 2 درجن کے قریب شامی خواتین اور چھوٹے بچے بھی شامل تھے) پر سفر کر رہے تھے۔
