اسلام آباد: (ویب ڈیسک) وزیر اعظم شہباز شریف نے برطانوی اخبار میں مضمون لکھا ہے جس میں کہا ہے کہ سیلاب زدہ پاکستان کی عالمی مدد کم ہو رہی ہے لیکن سیلابی پانی کم نہیں ہوا، ہمارا ملک اب بھی موسمیاتی تباہی کی گرفت میں ہے، لاکھوں افراد کو بچانے کیلئے بین الاقوامی امداد کی ضرورت ہے۔
انہوں لکھا ہے کہ سندھ اور بلوچستان کے وسیع علاقےاب بھی زیرِ آب ہیں، بارشوں اور سیلاب نے1700 جانیں لے لیں، سوئٹزرلینڈ جتنا رقبہ زیرِ آب آگیا، بارشوں اور سیلاب سے 3 کروڑ 30 لاکھ افراد متاثر ہوئے، سیلاب سےخوارک کی کمی کے شکار لوگوں کی تعداد دُگنی ہوکر ایک کروڑ 40 لاکھ ہو گئی ہے، 90 لاکھ دیگر لوگ انتہائی غربت کی سطح سے نیچے چلے گئے ہیں۔
شہباز شریف کا کہنا تھاکہ زیرِ آب علاقے مستقل جھیلوں کی صورت اختیار کرتے جا رہے ہیں، متاثرہ علاقوں کے لوگوں کی زندگیاں ہمیشہ کیلئے تبدیل ہو گئی ہیں، جتنے بھی پمپ لگا لیں، سیلابی پانی ایک سال میں بھی ہٹایا نہیں جا سکتا، پریشانی ہے کہ اِن علاقوں میں جولائی 2023 تک دوبارہ سیلاب آسکتا ہے، پاکستان صرف سیلاب سے نہیں، انتہائی موسمی حالات سے دوچار ہے۔
انہوں نے کہا کہ 2022 کے موسم بہار میں ہیٹ ویو والے بعض علاقےبعد میں زیر آب آئے، معاشی بحران کے باوجود ہم نے اپنے کمزور وسائل سے 1.5 ارب ڈالر کی ہنگامی امداد متحرک کی، عالمی بینک اور یورپی یونین کے مطابق ہمیں سیلاب سے 30 ارب ڈالرز نقصان پہنچا ہے، سیلاب سے پہنچنے والا نقصان پاکستان کے جی ڈی پی کا 10 فیصد ہے۔
وزیراعظم کا کہنا تھاکہ سیکرٹری جنرل اقوام متحدہ اور میں 9 جنوری کوبین الاقوامی کانفرنس کی مشترکہ میزبانی کررہےہیں، اُس ڈونر کانفرنس میں ہم بحالی اور تعمیرنو کا 2 حصوں پر مشتمل فریم ورک پیش کریں گے، پہلے حصے میں فوری بحالی کے چیلنجوں سے نمٹنے کیلئے 3 سال میں16.3ارب ڈالر فنڈنگ کا حصول ہے، فریم ورک کا دوسرا حصہ طویل المیعاد موسمیاتی مدافعت سے متعلق ہے اور دوسرے مرحلے کیلئے 10 سال میں 13.5 ارب ڈالر کی سرمایہ کاری چاہیے ہوگی۔

اسلام آباد: (ویب ڈیسک) وزیر خزانہ ومحصولات اسحاق ڈار نے کہا ہے کہ موجودہ حکومت کو ورثہ میں ملنے والی کمزور معیشت کے باوجود معاشی ترقی اور نمو کے حصول کیلئے تمام شعبوں میں اصلاحات متعارف کرائے جارہے ہیں۔
وزیر خزانہ اسحاق ڈار نے ایشیئن انفراسٹرکچر ڈویلپمنٹ بینک کے صدر لی چن کیان سے ورچوئل ملاقات میں گفتگو کرتے ہوئے کہا کہ حکومت کے عملی اقدامات کی بدولت ملک ترقی و خوشحالی کی راہ پرگامزن ہے، ایشیئن انفراسٹرکچر ڈویلپمنٹ بینک نے ہمیشہ مشکل وقت میں پاکستان کا ساتھ دیا ہے۔
اسحاق ڈار نے مزید کہا کہ ہماری حکومت کو ورثہ میں کمزور معیشت ملی ہے لیکن اس کے باوجود چیزوں کو درست سمت میں کرنے پر توجہ دے رہے ہیں اور معاشی ترقی و نمو کے حصول کیلئے تمام شعبوں میں اصلاحات متعارف کر رہے ہیں، حکومت کے عملی اقدامات کی بدولت ملک ترقی وخوشحالی کی راہ پرگامزن ہے۔
وزیر خزانہ نے بینک کے صدر کو پاکستان میں سیلاب سے ہونے والے نقصانات اور اس سے پاکستان کی معیشت پر پڑنے والے اثرات سے بھی آگاہ کیا اس کے علاوہ جنیوا میں ہونے والی ڈونرز کانفرنس کے حوالے سے بھی تبادلہ خیال کیا گیا۔

اسلام آباد: (ویب ڈیسک) اینٹی نارکوٹکس فورس (اے این ایف) نے ملک بھر میں کارروائیاں کرتے ہوئے سیکڑوں کلو گرام منشیات برآمد کی ہیں۔
ترجمان اے این ایف کے مطابق مین آرسی ڈی ہائی وے حب کے قریب خالی کنٹینر سے 306 کلو چرس برآمد کی گئی جس میں افغان باشندے سمیت مردان کے رہائشی ملزم کو گرفتار کر لیا گیا۔
کراچی مین سُپر ہائی وے پر کار سے 150 کلو چرس اور 9 کلو 600 گرام افیون برآمد کے واقعہ میں کراچی کا رہائشی ملزم گرفتار ہوا، اسلام آباد باد ٹول پلازہ پر 2 کاروں سے مجموعی طور پر 20 کلو 400 گرام چرس اور 9 کلو 600 گرام افیون برآمد کی گئی، کارروائی میں 3 ملزمان گرفتار ہوئے۔
ترجمان نے بتایا کہ اسلام آباد سرینگر ہائی وے پر کار سے 8 کلو 400 گرام چرس اور 6 کلو افیون برآمد ہوئی جس میں مردان کے رہائشی ملزم کو گرفتار کیا گیا، اسلام آباد انٹرنیشنل ایئرپورٹ پر شارجہ جانے والے ملزم کے پیٹ سے 76 ہیروئن بھرے کیپسولز برآمد کیے گئے، سمگلنگ میں ملوث شمالی وزیرستان کے رہائشی ملزم کو گرفتار کر لیا گیا۔
ترجمان اینٹی نارکوٹکس فورس کا کہنا ہے کہ تمام ملزمان کے خلاف انسدادِ منشیات ایکٹ کے تحت مقدمات درج کر لیے گئے ہیں۔