کابل: (ویب ڈیسک) افغانستان میں طالبان حکومت کے مرکزی ترجمان ذبیح اللہ مجاہد نے ایک بار پھر پاک افغان تعلقات کے حوالے سے بیان جاری کیا ہے۔
ذبیح اللہ مجاہد کے مطابق امارت اسلامیہ افغانستان پاکستان سمیت تمام پڑوسیوں کے ساتھ بہتر تعلقات چاہتی ہے، حالیہ دنوں پاکستانی حکام کی جانب سےافغانستان کے خلاف دیے جانے والے بیانات قابل افسوس ہیں۔
انہوں نے کہا کہ پوری کوشش کررہے ہیں افغان سرزمین پاکستان یاکسی بھی ملک کے خلاف استعمال نہ ہو، ہم اس مقصد کے لیے پوری طرح سنجیدہ ہیں۔
ان کا مزید کہنا تھاکہ امارت اسلامی اپنے ملک کے اندر امن و استحکام کو اہمیت دیتی ہے، اسی طرح پورے خطے کیلئے امن اور استحکام چاہتی ہے اور اس سلسلے میں اپنی کوششیں جاری رکھے گی۔
واضح رہے کہ گزشتہ دنوں وزیر داخلہ رانا ثنااللہ نے ایک انٹرویو میں کہا تھا کہ افغانستان نے کالعدم تحریک طالبان پاکستان کے ٹھکانوں کے خلاف کارروائی نہیں کی تو پاکستان افغانستان میں کالعدم ٹی ٹی پی ٹھکانوں کو نشانہ بنا سکتا ہے۔

جدہ: (ویب ڈیسک) سعودی انسانی حقوق کے کمیشن اور اقوام متحدہ کے ادارہ برائے منشیات و جرائم نے انسانی سمگلنگ کی روک تھام کے لیے ہونے والے معاہدے کے دوسرے مرحلے پر دستخط کر لیے ہیں۔
غیر ملکی میڈیا کی رپورٹ کے مطابق یہ معاہدہ کمیٹی برائے انسداد انسانی سمگلنگ کے قومی ایکشن پلان کے مقاصد کو پورا کرنے میں معاون ثابت ہو گا۔
سعودی انسانی حقوق کمیشن کی صدر ھلا التویجری نے کہا کہ انسانی سمگلنگ گھناؤنے جرائم میں سے ایک ہے جو انسانی حقوق کی خلاف ورزی کرتا ہے اور افراد کو ان کی آزادی اور وقار سے محروم رکھتا ہے۔
انہوں نے اس بات پر زور دیا کہ سعودی عرب نے قوائد و ضوابط لاگو کر کے اور عالمی معاہدوں کے ذریعے ایک قانونی اور ادارہ جاتی فریم ورک تیار کیا ہے جو بغیر کسی امتیاز کے ہر ایک شخص کی حفاظت کو یقینی بناتا ہے اور متاثرہ افراد کی مدد کرتا ہے۔
اقوام متحدہ کے دفتر برائے منشیات اور جرائم کے علاقائی نمائندے جج حاتم علی نے ممکت کے ساتھ ہونے والی شراکت داری کا خیر مقدم کرتے ہوئے اس بات پر زور دیا کہ اس معاہدے کا مقصد موجودہ اشتراک کو آگے بڑھانا ہے اور ان جرائم کو قومی، علاقائی اور بین الاقوامی سطح پر روکنا ہے۔

کیف: (ویب ڈیسک) یوکرینی صدر زیلنسکی کے دفتر نے اعلان کیا ہے کہ سیاسی سطح پر یورپی یونین اور یوکرین 3 فروری کو کیف میں ایک سربراہی اجلاس منعقد کریں گے جس میں مالی اور فوجی مدد پر تبادلہ خیال کیا جائے گا۔
بیان میں کہا گیا ہے کہ زیلنسکی نے اس سال اپنی پہلی فون کال میں یورپی کمیشن کی صدر ارسولا وین ڈیر لاین کے ساتھ اس ملاقات کی تفصیلات پر تبادلہ خیال کیا۔ بیان میں مزید کہا گیا کہ دونوں فریقوں نے اس سربراہی اجلاس کی تیاری کے کام کو تیز کرنے پر اتفاق کیا۔
دوسری جانب یوکرینی فوج کے جنرل سٹاف نے اعلان کیا ہے کہ اس نے 24 گھنٹوں کے اندر روسی افواج کے ٹھکانوں پر 13 میزائل اور توپ خانے سے حملے کیے ہیں۔ یوکرین کی فوج نے کہا ہے کہ اس نے ڈونیٹسک کے 15 علاقوں میں روسی دراندازی کو ناکام بنا دیا ہے۔
یوکرینی فوج نے روس پر الزام لگایا ہے کہ وہ کھیرسن میں دریائے دنیپرو کے دائیں کنارے میں آبادی والے علاقوں پر بمباری کر رہا ہے۔ یوکرینی فوج نے کہا کہ یوکرین بھر میں اہم بنیادی ڈھانچے پر روسی فضائی اور میزائل حملوں کا خطرہ بدستور موجود ہے۔