تل ابیب: اسرائیلی وزیراعظم نیتن یاہو نے کہا ہے کہ غزہ میں غیر ملکی این جی او ’’ورلڈ سینٹرل کیچن‘‘ کی گاڑی پر فضائی حملہ افسوسناک اور غیر ارادی طور پر ہوا تھا۔
عالمی خبر رساں ادارے کے مطابق اسرائیلی وزیراعظم نیتن یاہو نے کہا کہ غزہ میں اسرائیلی فضائی حملے میں غیر ملکی این جی او کے 6 اہلکاروں کی ہلاکت کی تحقیقات کر رہے ہیں۔
اسرائیلی وزیراعظم نیتن یاہو نے اس افسوسناک واقعے پر افسوس کا اظہار کرتے ہوئے کہا کہ یقین دلاتا ہوں کہ ایسا واقعہ دوبارہ نہیں ہوگا۔
قبل ازیں اسرائیلی ترجمان ڈینیئل ہاگری نے اپنے بیان میں کہا تھا کہ اسرائیلی فوج براہ راست ذمہ داری قبول کیے بغیر واقعے کی تحقیقات کرے گی۔
خیال رہے کہ غزہ میں ایک غیر ملکی این جی او کی گاڑی اسرائیل کے فضائی حملے میں مکمل طور پر تباہ ہوگئی اور 6 اہلکار ہلاک ہوگئے جن کا تعلق فلسطین، آسٹریلیا، پولینڈ اور برطانیہ تھا۔
ہلاک ہونے والوں میں سے دو کے پاس امریکا اور برطانیہ کی بھی شہریت تھی۔ اس واقعے کے بعد سے اسرائیل پر عالمی دباؤ بڑھ گیا ہے۔
