پشاور: خیبر پختونخوا حکومت نے 9 مئی واقعات کی تحقیقات کے لیے جوڈیشل کمیشن کے معاملے پر پشاور ہائیکورٹ سے رجوع کر لیا۔
وزیر قانون آفتاب عالم کے مطابق خیبر پختونخوا حکومت نے چیف جسٹس ہائیکورٹ کو خط لکھ دیا ہے جس میں چیف جسٹس سے جوڈیشل کمیشن کے قیام کی استدعا کی گئی ہے۔
وزیر قانون نے بتایا کہ چیف جسٹس جوڈیشل کمیشن کے لیے جج کا نام دیں گے لیکن چیف جسٹس کی طرف سے فی الحال جواب موصول نہیں ہوا۔
واضح رہے کہ خیبر پختونخوا کابینہ نے جوڈیشل کمیشن کے قیام کی منظوری دی تھی جو ہائیکورٹ کے جج کی سربراہی میں قائم ہوگا۔
