وقت پر اپنی منرل تک پہنچنے کیلئے دنیا بھر میں لوگ طرح طرح کے جتن کرتے ہیں، لیکن بسا اوقات ٹریفک جام جیسے مسائل بڑی رکاوٹ بن جاتے ہیں جن سے نکلنا عذاب بن جاتا ہے۔
حال ہی میں ایک بھارتی طالبعلم نے امتحان گاہ وقت پر پہنچنے کا انوکھا طریقہ اختیار کر کے سب کو حیران کر دیا جس کی ویڈیو سوشل میڈیا پر وائرل ہوگئی۔
بھارتی ریاست مہاراشٹر کے ایک نوجوان سمرتھ مہانگاڈے نے امتحانات کے دوران ٹریفک جام سے بچنے کیلئے ایسا زبردست حل نکالا جسے دیکھ کر سب حیرت میں مبتلا ہوگئے۔
سمرتھ مہانگاڈے اپنے امتحان کے دن کسی کام کے سلسلے میں دوسرے ضلع میں موجود تھا، جب انہوں نے دیکھا کہ پرچہ شروع ہونے میں صرف 15 سے 20 منٹ کا وقت باقی رہ گیا ہے اور سڑکوں پر بدترین ٹریفک جام ہے تو انہیں ایک انوکھی ترکی سوجھی۔
نوجوان نے متبادل راستہ اختیار کرتے ہوئے زمین کے بجائے آسمان سے اپنی امتحان گاہ جانے کا فیصلہ کیا۔
سوشل میڈیا پر وائرل ہونے والی ایک ویڈیو میں دیکھا جاسکتا ہے کہ سمرتھ اپنے کالج بیگ کے ساتھ آسمان میں پرواز کرتے ہوئے پیرا گلائیڈنگ کے ذریعے حیران کن انداز میں امتحانی مرکز پہنچ رہا ہے۔
یہ سب ایک معروف ایڈونچر سپورٹس انسٹرکٹر گووند ییوالے کی مدد سے ممکن ہوا، جنہوں نے نہ صرف پیراگلائیڈنگ کا انتظام کیا بلکہ سمرتھ کو بالکل صحیح وقت پر امتحانی مرکز کے قریب اُتار بھی دیا۔
انسٹاگرام پر پوسٹ کی جانے والی اس ویڈیو نے لاکھوں صارفین کی کافی توجہ حاصل کرلی ہے جس پہر طرح طرح کے تبصرے سامنے آرہے ہیں۔
کچھ لوگوں نے سمرتھ کی تخلیقی صلاحیتوں کی تعریف کی ہے جبکہ کچھ لوگوں نے اسے ’دیسی ٹام کروز‘ قرار دیتے ہوئے مذاق بھی اڑایا۔
