- گجرات: وزیراعلیٰ پنجاب مریم نواز شریف نے کہا ہے کہ خیبرپختونخوا کے لوگ اب بھی پتھر کے زمانے میں رہ رہے ہیں، انہیں ترقی کا پتہ ہی نہیں، خیبرپختونخوا کے بچوں کے ذہنوں میں تشدد سے محبت بھری جا رہی ہے، اقتدار آنے جانے والی چیز، مٹھی سے ریت کی طرح پھلستا ہے۔
مریم نواز کا گجرات یونیورسٹی میں تقریب کے دوران طلبا سے کہنا تھا کہ ایک ماں کے طور پر آپ سے ایک وعدہ کرنے آئی ہوں، پنجاب کے تمام وسائل اپنے بیٹوں،بیٹیوں پر نچھاور کرنے ہیں، آپ بچوں نے جو خواب دیکھنا ہے دیکھیں، میرے تمام وسائل آپ کے قدموں میں حاضر ہیں۔
انہوں نے کہا کہ ہونہار سکالر شپس، لیپ ٹاپس 100 فیصد میرٹ پر دیئے جارہے ہیں، میں اللہ کے سامنے جوابدہ ہوں، کوئی نہیں کہہ سکتا فلاں کو ہونہار سکالر شپ سفارش پر ملا ہے، جو بچہ میرٹ پر ہے اس کے پاس اپنا لیپ ٹاپ، سکالر شپ ہے۔
وزیر اعلیٰ کا کہنا تھا کہ آپ کی کامیابی پر والدین سے زیادہ میں خوش ہوں، جین زی پنجاب کا مستقبل ہیں اوروہ صحیح راستے پر ہیں، پنجاب میں جین زی کو اس کا حق مل رہا ہے، آپ اس ملک کا مستقبل ہیں، آپ نے اس ملک کی باگ دوڑ سنبھالنی ہے بلکہ اس ملک کی بقا جین زی کے ہاتھوں میں ہے۔
تقریب کر دوران انہوں نے کہا کہ میں نے 2026 کو نوجوانوں کا سال قرار دیا ہے، کوشش ہے آپ کی زندگی میں کوئی کمی نہ ہو، تمام سہولیات آپ کو دوں، مجھے بدلے میں ذاتی طور پر آپ سے کچھ نہیں چاہیے، چاہتی ہوں آپ وطن کی مٹی کو محسوس کریں، ہمارے اوپر ملک اوراس مٹی کا قرض ہے۔
مریم نواز کا کہنا تھا کہ اٹک کے اُس پار خیبرپختونخوا ہے، خیبرپختونخوا کے بچوں کے ہاتھ میں ہتھیار، زبان پر گالی ہے، خیبرپختونخوا کے بچوں کے ذہنوں میں تشدد سے محبت بھری جارہی ہے، خیبرپختونخوا کے بچوں کو کہا جاتا ہے سڑکیں اوردکانیں بند کرو۔
انہوں نے پنجاب کے بچوں کے بارے میں کہا کہ ان کے ہاتھوں میں ہونہار سکالر شپس، لیپ ٹاپس اور پرواز کارڈ ہیں جبکہ پنجاب کے لاکھوں بچے ٹیکنیکل ٹریننگ حاصل کررہے ہیں، پنجاب کے بچے تعلیمی اداروں میں جانے کیلئے مفت گرین بسیں استعمال کرتے ہیں، ادھر ہونہار ہے اُدھر انتشار ہے۔
وزیر اعلیٰ کا کہنا تھا کہ میں پنجابی بعد میں اور پہلے پاکستانی ہوں، خیبرپختونخوا کے لوگ اب بھی پتھر کے زمانے میں رہ رہے ہیں، ان لوگوں کو پتہ ہی نہیں کہ ترقی کیا ہوتی ہے، دنیا سے مقابلہ کرنے کیلئے آپ کے ہاتھ میں لیپ ٹاپ ،ہونہار سکالر شپ ہونا چاہیے۔
انہوں نے کہا کہ کے پی حکومت صرف شعور دے رہی ہے، خیبرپختونخوا کے راستے بند کرنے سے پنجاب کو کوئی فرق نہیں پڑتا، سندھ کے مریض علاج سے محروم نہیں ہوتے، چند لوگوں کو کہا گیا تم نے ڈنڈے سے روزگار بند کرانے ہیں۔
