حالیہ مہینوں میں گوگل کا نانو بنانا امیج جنریٹر بہت زیادہ مقبول ہوا ہے اور اس سے جیمنائی آرٹی فیشل انٹیلی جنس (اے آئی) ماڈل کو استعمال کرنے والے افراد کی تعداد میں بھی اضافہ ہوا۔
گوگل بھی اس امیج جنریٹر کی مقبولیت سے واقف ہے اور یہی وجہ ہے کہ کمپنی کی جانب سے اسے اپنی ایک اور مقبول ایپ گوگل میپس کا حصہ بنانے پر کام کیا جا رہا ہے۔
ویسے تو سننے میں یہ عجیب محسوس ہوتا ہے کہ ایک نیوی گیشن ایپ میں اے آئی امیج جنریٹر کا اضافہ کر دیا جائے۔
مگر اینڈرائیڈ اتھارٹی کی ایک رپورٹ کے مطابق گوگل کی جانب سے ایسا کیا جا رہا ہے۔
رپورٹ میں بتایا گیا کہ گوگل میپس کے تازہ ترین ورژن کے کوڈ سے عندیہ ملا ہے کہ نانو بنانا کو میپس کا حصہ بنایا جا رہا ہے۔
اگر آپ سوچ رہے ہیں کہ آخر نانو بنانا کو گوگل میپس میں کیسے استعمال کیا جائے گا تو رپورٹ میں بتایا گیا کہ آپ اسے ممکنہ طور پر اسٹریٹ میں دستیاب مقامات کی تصاویر بنانے کے لیے استعمال کرسکیں گے۔
رپورٹ کے مطابق نانو بنانا سے وہ مقامات زیادہ نئے انداز کے نظر آئیں گے، جس کا انحصار آپ کی تحریری ہدایات پر ہوگا۔
