اسلام آباد : نیپرا نے بجلی کے بنیادی ٹیرف ڈھانچے میں بڑی تبدیلی کر دی، نئے فارمولے کے تحت اب بجلی کا بل صرف آپ کے استعمال کردہ یونٹس پر منحصر نہیں ہوگا۔
تفصیلات کے مطابق نیشنل الیکٹرک پاور ریگولیٹری اتھارٹی نے وفاقی حکومت کی درخواست پر بجلی کے ٹیرف ڈھانچے میں بنیادی تبدیلی کی منظوری دے دی۔
جس کے بعد ملک بھر کے صارفین کے لیے بجلی کے بلوں میں ہوش ربا اضافے کا خدشہ پیدا ہو گیا ہے۔
نئے نظام کے تحت اب فکسڈ چارجز کا تعین بجلی کے استعمال (یونٹس) کے بجائے صارف کے منظور شدہ لوڈ کی بنیاد پر کیا جائے گا۔
جنوری 2026 سے نافذ العمل ہونے والے اس نئے فریم ورک کے تحت لائف لائن صارفین کے علاوہ تمام گھریلو صارفین پر فکسڈ چارجز لاگو ہوں گے۔
فکسڈ چارجز صرف 300 یونٹ سے زائد استعمال کرنے والے صارفین پر 200 سے 1000 روپے کے درمیان لگائے جاتے تھے لیکن اب کم یونٹ استعمال کرنے والے صارفین کو بھی بھاری فکسڈ چارجز ادا کرنے ہوں گے، یہ چارجز 200 روپے سے لے کر 675 روپے فی کلو واٹ تک مقرر کیے گئے ہیں۔
اس تبدیلی کا سب سے زیادہ اثر ان گھرانوں پر پڑے گا جن کا منظور شدہ لوڈ زیادہ ہے لیکن بجلی کا استعمال کم ہے۔
اگر کسی صارف کا منظور شدہ لوڈ 5 کلو واٹ ہے، تو اسے پہلے زیادہ سے زیادہ 1,000 روپے فکسڈ چارجز دینا پڑتے تھے، لیکن اب اسے ماہانہ تقریباً 3,375 روپے صرف فکسڈ چارجز کی مد میں ادا کرنے ہوں گے، چاہے وہ بجلی استعمال کرے یا نہ کرے۔
اس فیصلے نے ملک بھر کے صارفین میں تشویش کی لہر دوڑا دی ہے۔ شہریوں کا کہنا ہے کہ پہلے سے ہی مہنگائی کے ستائے ہوئے عوام کے لیے بجلی کے بلوں میں یہ اضافہ ناقابلِ برداشت ہے۔ ماہرین کے مطابق اب بجلی کا بل صرف استعمال شدہ یونٹس پر منحصر نہیں رہا بلکہ منظور شدہ لوڈ کی بنیاد پر ایک مستقل بھاری رقم ہر ماہ بل کا حصہ بنے گی۔
