کراچی (21 مئی 2026): ایران کی جنگ کے باعث اس سال حج کے اخراجات میں 4 گناہ اضافہ ہوا ہے۔
بدھ کے روز شائع ہونے والی نیوز ویب سائٹ سیمافور گلف کی ایک رپورٹ میں کہا گیا ہے کہ ایران جنگ کے باعث دنیا کے سب سے بڑے سالانہ مذہبی اجتماع، حج، کے اخراجات میں اضافہ ہو رہا ہے۔
اس سال خلیجی خطے میں پروازوں کی محدود دستیابی اور سپلائی راستوں میں رکاوٹوں کے سبب سفری پیکجوں کی قیمتیں روانگی سے قبل ’’تین سے چار گنا‘‘ تک بڑھ گئی ہیں۔
رپورٹ میں مزید بتایا گیا کہ انڈونیشیا، پاکستان اور ملائیشیا سمیت کئی حکومتوں نے عازمینِ حج پر بڑھتے ہوئے مالی بوجھ کو کم کرنے کے لیے سبسڈی فراہم کی ہے، تاکہ مکہ مکرمہ کے سالانہ سفر سے قبل اخراجات کو قابو میں رکھا جا سکے۔
حج کے مرکزی مناسک آئندہ ہفتے مکہ مکرمہ میں شروع ہوں گے۔ گزشتہ سال تقریباً 16 لاکھ مسلمان فریضۂ حج ادا کرنے پہنچے تھے، جن میں انڈونیشیا، پاکستان اور بھارت سے آنے والے عازمین کی تعداد سب سے زیادہ تھی۔ مختلف حکومتیں حج کے سفر کو منظم اور سبسڈی فراہم کرتی ہیں، جب کہ بعض ممالک اضافی اخراجات بھی برداشت کر رہے ہیں۔
انڈونیشیا نے اپنے 2 لاکھ 21 ہزار عازمین کو قیمتوں میں اضافے سے بچانے کے لیے ایئر لائن اخراجات میں اضافی 10 کروڑ 70 لاکھ ڈالر برداشت کیے، جب کہ پاکستان اور ملائیشیا نے بھی سبسڈی فراہم کی۔ دوسری جانب بھارت نے فضائی ایندھن کے بڑھتے اخراجات کا حوالہ دیتے ہوئے 100 ڈالر اضافی سرچارج عائد کیا۔
مذہبی سیاحت سعودی عرب کے وژن 2030 حکمتِ عملی کا اہم حصہ ہے، جس کے تحت مملکت حج اور عمرہ سے منسلک ہوائی اڈوں، ٹرانسپورٹ اور ہوٹلنگ کے شعبے میں بڑے پیمانے پر سرمایہ کاری کر رہی ہے۔
