وزارت خزانہ نے فنڈز کے اجراء کو مالی گنجائش سے مشروط کر دیا

کراچی (این این آئی) وزارت خزانہ نے فنڈز کے اجراء کو دستیاب مالی گنجائش سے مشروط کرتے ہوئے ضمنی گرانٹس اور فنڈز کی دوبارہ تخصیص کا طریقہ کار مزید سخت کر دیا۔ وزارت خزانہ کی جانب سے جاری نئی مالی ہدایات کے مطابق فنڈز کی دوبار ہ تخصیص اور اضافی رقوم کی فراہمی کیلئے نئے قواعد نافذ کیے گئے ہیں۔ 31 مئی کی مقررہ ڈیڈ لائن میں نرمی صرف غیر معمولی حالات میں کی جائے گی، جبکہ جون میں ناگزیر ادائیگیوں اور تنخواہوں کی کمی کے معاملات میں رعایت دی جاسکے گی۔ نئی ہدایات کے تحت جاری نہ کیے گئے بجٹ سے فنڈز کی دوبارہ تخصیص پر پابندی ہوگی، تاہم مجاز افسران اپنے تفویض کردہ مالی اختیارات کے اندر رہتے ہوئے فنڈز کی دوبارہ تخصیص کرسکیں گے۔ ملازمین سے متعلق اخراجات میں کمی کی صورت میں نان ایمپلائز اخراجات سے فنڈز منتقل کرنے کی بھی اجازت ہوگی۔ وزارت خزانہ نے ایڈہاک ریلیف الاؤنس 2026ء کی ادائیگی کیلئے اضافی فنڈز فراہم کر دیئے ہیں، تاہم اس مقصد کیلئے مختص فنڈز کی دوبارہ تخصیص صرف اسی مد میں کی جاسکے گی اور یہ سہ ماہی اجراء کی مقررہ حدود میں رہے گی۔ ہدایات کے مطابق ٹیکنیکل سپلیمنٹری گرانٹس کی درخواستیں صرف پرنسپل اکاؤنٹنگ افسران جمع کراسکیں گے، جبکہ ایسی گرانٹس کیلئے مساوی رقم سرنڈر کرنے کی تصدیق لازمی ہوگی۔ وزارت خزانہ نے سپلیمنٹری گرانٹس کے ذریعے پارلیمنٹ سے منظور شدہ سطح سے زائد اخراجات کی حوصلہ شکنی کا فیصلہ کیا ہے۔ شدید قدرتی آفات کے علاوہ اضافی غیر بجٹ اخراجات کیلئے سپلیمنٹری گرانٹ کی درخواست زیر غور نہیں لائی جائے گی۔ پی ایس ڈی پی سے متعلق ٹیکنیکل سپلیمنٹری گرانٹس کے معاملات وزارت منصوبہ بندی کے ذریعے نمٹائے جائیں گے۔ وزارت خزانہ کے مطابق نئی مالی ہدایات رواں مالی سال اور آئندہ مالی سالوں کیلئے نافذ کر دی گئی ہیں۔