سرکاری ہسپتالوں میں جعلی نوکریاں کرانے والا نوسرباز گینگ سرگرم ہو گیا

لاہور (جنرل رپورٹر)سرکاری ہسپتالوں میں جعلی نوکریاں کرانے والا نوسرباز گینگ سرگرم ، لاہور جنرل ہسپتال میں مبینہ طور پر 80ہزار روپے کے عوض ڈیٹا انٹری آپریٹر کا جعلی تقرر نامہ جاری کیے جانے کا انکشاف ہوا ہے جس سے سرکاری ہسپتالوں میں بھرتیوں کے نظام اور دستاویزات کی تصدیق کے طریق کار پر سنگین سوالات اٹھ گئے ہیں۔ سامنے آنے والی دستاویز پر لاہور جنرل ہسپتال ،محکمہ صحت پنجاب کے نام اور متعلقہ افسران کے دستخط و مہریں درج ہیں جبکہ لیٹر پر 8اکتوبر 2026کی تاریخ اور امیدوار کو 10نومبر 2026تک جوائننگ کی ہدایت درج ہے۔ تاہم دستاویز کی تصویر کی بنیاد پر اس کے اصلی یا جعلی ہونے کی حتمی تصدیق نہیں کی جا سکتی۔ ذرائع کے مطابق مبینہ طور پر 80ہزار روپے کے عوض یہ تقرر نامہ جاری کیا گیا جس کے بعد یہ سوال پیدا ہوتا ہے کہ اگر بھرتی کے نام پر رقم وصول کی گئی تو اس کے پیچھے کون ملوث ہے اور امیدوار کو سرکاری ملازمت کا جھانسہ کس نے دیا۔ ماہرین کا کہنا ہے کہ ہسپتال انتظامیہ کے لیے ضروری ہے کہ تقرر نامے کا ڈائری نمبر، ریکارڈ، متعلقہ منظوری اور جوائننگ کی حیثیت فوری طور پر چیک کرکے حقائق سامنے لائے جائیں۔ سرکاری ملازمت کے نام پر شہریوں سے رقم بٹورنے کے الزامات محض امیدواروں کے مالی استحصال کا معاملہ نہیں بلکہ سرکاری اداروں کی ساکھ سے بھی جڑے ہیں۔ اگر تقرر نامہ جعلی ثابت ہوتا ہے تو اس کی تیاری، فراہمی اور مبینہ رقم وصول کرنے میں ملوث عناصر کے خلاف قانونی کارروائی کی جائے جبکہ اگر دستاویز اصلی ہے تو بھرتی کے قانونی طریقہ کار اور رقم وصولی سے متعلق الزامات کی وضاحت کی جائے۔ ہسپتال انتظامیہ اور محکمہ صحت پنجاب کا موقف سامنے آنا بھی ضروری ہے تاکہ ذمہ داروں کا تعین شواہد کی بنیاد پر کیا جا سکے۔