بینکاک (نیوز ایجنسیاں )وزیر خزانہ محمد اورنگزیب نے کہا ہے کہ پاکستان اپنے مالی وسائل کے ذرائع میں تنوع لانے کا سلسلہ جاری رکھے گا،قومی ٹیرف پالیسی پر کوئی سمجھوتہ نہیں ہوگا، حکومت چینی یوآن میں مزید بانڈز جاری کرنے اور جاپانی مارکیٹ سے سامورائی بانڈز کے اجرا کے ذریعے سرمایہ حاصل کرنے پر غور کر سکتی ہے۔پاکستان نے رواں سال مئی کے وسط میں 1.75 ارب چینی یوآن، یعنی 26 کروڑ 10 لاکھ ڈالر مالیت کے پہلے پانڈا بانڈز جاری کیے تھے۔ یہ اجرا 7.2 ارب یوآن کے مجموعی پروگرام کا حصہ تھا، جس کے لیے ایشیائی ترقیاتی بینک اور ایشیائی انفرااسٹرکچر انویسٹمنٹ بینک نے جزوی ضمانتیں فراہم کیں۔بین الاقوامی مالیاتی فنڈ(آئی ایم ایف) اور عالمی بینک کے سالانہ اجلاسوں کے موقع پر جاپانی جریدے نکی ایشیا کو انٹرویو دیتے ہوئے وزیر خزانہ نے کہا کہ پاکستان اپنے بیرونی قرضوں کی مجموعی مالیت میں اضافہ نہیں کرنا چاہتا، تاہم حکومت مالی وسائل کے ذرائع مزید متنوع بنانے میں دلچسپی رکھتی ہے۔وزیر خزانہ نے واضح کیا کہ قومی ٹیرف پالیسی برآمدات بڑھانے میں مدد دے سکتی ہے، قومی ٹیرف پالیسی پر کوئی سمجھوتہ نہیں کیا جائے گا۔ یہ پالیسی صرف آٹو موبائل صنعت تک محدود نہیں بلکہ عمومی طور پر تمام صنعتی شعبوں سے متعلق ہے۔وزیر خزانہ نے کہا کہ پاکستان اس وقت آئی ایم ایف کی مالی معاونت سے نکلنے میں کامیاب ہو گا جب عالمی برادری کو یقین ہو جائے گا کہ ملک کو ہنگامی حالات میں آخری سہارے کے طور پر قرض دینے والے ادارے کی ضرورت نہیں رہی۔دریں اثناء پاکستان قرض لینے والے ممالک کی عالمی قیادت سنبھالنے کیلئے منتخب ہوگیا ۔بینکاک میں منعقدہ ورلڈ بینک اور بین الاقوامی مالیاتی فنڈ (آئی ایم ایف ) کے سالانہ اجلاسوں کے موقع پر 30سے زائد ترقی پذیر ممالک پر مشتمل نئے تشکیل شدہ بارورز پلیٹ فارم کی گورننگ کونسل کا پہلا اجلاس منعقد ہوا، جس میں پاکستان کو متفقہ طور پر کونسل کا چیئرمین منتخب کر لیا گیا ۔ وفاقی وزیر برائے خزانہ و محصول سنجیدہ سینیٹر محمد اورنگزیب نے ملک کی جانب سے اس عہدے کی ذمہ داریاں قبول کر لیں۔دریں اثناء وفاقی وزیر خزانہ سینیٹر محمد اورنگزیب نے کہا ہے کہ پاکستان میں آبادی میں تیزرفتار اضافہ صحت، تعلیم اور روزگار کیلئے بڑا چیلنج ہے، آبادی میں اضافے کو انسانی وسائل کی ترقی اور روزگار کیمواقع میں تبدیل کرنا ہوگا۔عالمی بینک کے زیراہتمام گول میزکانفرنس سے خطاب میں محمد اورنگزیب نے کہا کہ بچوں کی پیدائش میں مناسب وقفے سے متعلق آگاہی بڑھانے کی ضرورت ہے، آبادی سے متعلق آگاہی کیلئے مذہبی رہنمائو ں سے رابطہ اہم ہے، خواتین کی تعلیم اور روزگار میں شمولیت بڑھانا ضروری ہے۔ دریں اثنا وزیرخزانہ محمد اورنگزیب نے آئی ایف سی کے مشرقِ وسطی اور وسطی ایشیا کے علاقائی نائب صدر سے ملاقات کی، نجی شعبے کی قیادت میں معاشی ترقی،روزگارمواقع کے فروغ کیلئے آئی ایف سی تعاون مضبوط بنانے پر تبادلہ خیال کیا گیا۔
وزیر خزانہ
