چکالہ کنٹونمنٹس بورڈز کے ملازم نے اپنے ہی افسر کے خلاف مبینہ کرپشن کی درخواست دے دی

راولپنڈی (عرفان چوہان سے)ڈی جی ملٹری لینڈ اینڈ کنٹونمنٹس بورڈز کے ایک ملازم نے اپنے ہی افسر کے خلاف مبینہ کرپشن اور اثاثے بنانے کے الزامات کے تحت نیب اور ڈی جی ملٹری لینڈ اینڈ کنٹونمنٹس بورڈز کو درخواستیں دے دی ہیں۔ درخواست گزار نے مطالبہ کیا ہے کہ مذکورہ افسر نے مبینہ کرپشن کے ذریعے کروڑوں روپے کے جو اثاثے بنائے ہیں، ان کی تحقیقات کی جائیں اور اثاثے نیلام کرکے رقم قومی خزانے میں جمع کروائی جائے۔تفصیلات کے مطابق ڈی جی آفس میں تعینات مستحسن خان نے نیب اسلام آباد کو درخواست دیتے ہوئے موقف اختیار کیا ہے کہ فرخ حنیف ڈائریکٹر ہیڈ کوارٹر میڈم صائمہ شاہ کے ساتھ ڈیوٹی سرانجام دے رہے تھے، جبکہ وہ خود بھی 2021 سے چکلالہ کینٹونمنٹ بورڈ اور ریجنل ہیڈ کوارٹر راولپنڈی میں فرائض انجام دینے کے ساتھ فرخ حنیف کے گھر پر بھی کام کرتے رہے۔ بعد ازاں نعمان بشیر، جو اس وقت ڈی اے ڈی راولپنڈی تعینات تھے، کے ساتھ فرخ حنیف کے کسی ذاتی اختلاف کی وجہ سے انہیں ڈائریکٹر آفس سے نکلوا کر اپنے گھر کا مستقل ملازم بنا لیا گیا، جبکہ دوسری جانب چکلالہ کینٹونمنٹ بورڈ میں ان کی حاضری بھی لگتی رہی پھر 2025 میں جب میجر جنرل جواد احمد ڈی جی ملٹری لینڈ اینڈ کنٹونمنٹس بورڈز تعینات ہوئے تو فرخ حنیف نے ان کے خوف سے انہیں اپنے ساتھ ہیڈ کوارٹر میں ڈائریکٹر ہیڈ کوارٹر کے نائب قاصد کی ڈیوٹی پر لگوا دیا۔ڈائریکٹر ہیڈ کوارٹر کے پاس پہلے ہی تین نائب قاصد کام کر رہے تھے، تاہم انہیں بھی ڈائریکٹر ہیڈ کوارٹر کے اسٹاف میں شامل کروا لیا گیا، جبکہ وہ مبینہ طور پر فرخ حنیف کے ذاتی ملازم کے طور پر ان کے گھر پر بھی کام کرتے رہے۔اسٹور انچارج ہارون بھی فرخ حنیف کے ساتھ مبینہ طور پر ملوث ہیں جو کہ بہت کرپٹ انسان ہے اور دونوں مل کر محکمے کو مالی طور پر لوٹ رہے ہیں۔ ان کا کہنا ہے کہ اگر دونوں کے اثاثوں کی جانچ پڑتال کی جائے تو مبینہ کرپشن کے بارے میں حقائق سامنے آ سکتے ہیں۔ درخواست گزار کے مطابق فرخ حنیف نے گاڑیاں، بینک بیلنس اور کوٹھیاں اپنے رشتہ داروں کے نام پر رکھی ہوئی ہیں، لہذا انکوائری کرکے معلوم کیا جائے کہ ان کے پاس اتنا سرمایہ کہاں سے آیا۔ فرخ حنیف کی عیاشیوں کے لیے تھائی لینڈ اور دیگر ممالک کے دورے کرتے ہیں، ان سے پوچھا جائے اتنی عیاشوں کے لیے اتنا پیسہ کہاں سے لاتے ہیں اور ان کے اخراجات کے ذرائع کی بھی تحقیقات کی جانی چاہئیں۔ درخواست گزار کے مطابق ممکنہ طور پر ان اخراجات کے حوالے سے یہ موقف اختیار کیا جا سکتا ہے کہ ان کا چھوٹا بھائی بیرون ملک مقیم ہے اور اخراجات برداشت کرتا ہے، تاہم ان کے بقول حقیقت یہ ہے کہ ان کا بھائی بھی فرخ حنیف سے سخت نالاں ہے۔مستحسن خان نے درخواست میں مزید موقف اختیار کیا ہے کہ جب فہیم ظفر، جو اس وقت موجودہ سینئر جوائنٹ سیکرٹری ایڈمن ہیں، ڈائریکٹر راولپنڈی ریجن تعینات تھے تو انہوں نے فرخ حنیف کو مبینہ کرپشن اور غلط حرکات کی وجہ سے ڈائریکٹر آفس راولپنڈی سے واپس چکلالہ کینٹونمنٹ بورڈ بھیج دیا تھا۔ بعد ازاں خورشید خان، سابق ایڈیشنل ڈی جی، کی سفارش پر فرخ حنیف کو دوبارہ ہیڈ کوارٹر بلوا لیا گیا۔ درخواست کے مطابق سابق ایڈیشنل ڈی جی رانا منظور نے بھی فرخ حنیف کو اپنے ساتھ بطور پی اے/اے پی ایس کام کرنے کی اجازت نہیں دی اور انہیں واپس چکلالہ کینٹونمنٹ بورڈ بھیجنے کے احکامات جاری کیے، تاہم فرخ حنیف نے مبینہ طور پر سابق ایڈیشنل ڈی جی کے ذریعے ڈائریکٹر ہیڈ کوارٹر سے سفارش کروا کر یہ احکامات رکوا لیے اور اپنی ڈیوٹی ڈائریکٹر ہیڈ کوارٹر کے ساتھ بطور پی اے/اے پی ایس لگوا لی۔درخواست گزار کے مطابق فرخ حنیف نے اے پی ایس کی سیٹ پر ڈیپوٹیشن کا حکم نامہ بھی مزید دو سال کے لیے تجدید کروا لیا، حالانکہ ان کے بقول وہ اس تعیناتی کے اہل نہیں تھے۔ درخواست میں سوال اٹھایا گیا ہے کہ کلریکل کیڈر میں آنے والا یو ڈی سی کس طرح بی ایس-16 کی اے پی ایس کی سیٹ پر ڈیپوٹیشن کے ذریعے کام کر سکتا ہے۔ مستحسن خان کے مطابق فرخ حنیف پہلی مرتبہ اے پی ایس کی حیثیت سے ڈیپوٹیشن پر تعینات ہوئے تو اسی دوران انہیں اپنے سابقہ عہدے پر ترقی بھی مل گئی، تاہم اس کے باوجود وہ اے پی ایس کی سیٹ پر برقرار رہے۔درخواست گزار کا موقف ہے کہ ڈیپوٹیشن کے دوران اپنے سابقہ عہدے یا سکیل میں ترقی ملنے کی صورت میں متعلقہ ملازم کو ڈیپوٹیشن والی سیٹ چھوڑنی پڑتی ہے، لیکن فرخ حنیف تاحال اے پی ایس کی سیٹ پر تعینات ہیں۔ انہوں نے الزام عائد کیا ہے کہ اس عمل سے محکمے کو مالی نقصان پہنچا ہے، لہذا فرخ حنیف کے خلاف انکوائری کرکے مبینہ نقصان کا تعین کیا جائے اور قانون کے مطابق رقم کی ریکوری کی جائے۔مستحسن خان نے مزید کہا ہے کہ فرخ حنیف مذکورہ سیٹ چھوڑنے کے لیے تیار نہیں، حالانکہ ان کے بقول چکلالہ کینٹونمنٹ بورڈ میں ان کے لیے بہتر مستقبل کے مواقع موجود ہیں اور ہیڈ کوارٹر میں بھی متعدد افسران ان سے خوش نہیں ہیں۔