کراچی پورٹ پر 4 جہازوں سے1 لاکھ 8 ہزار ٹن کھاد پہنچ گئی

کراچی (این این آئی) کراچی گیٹ وے ٹرمینل ملٹی پرپز لمیٹڈ پر کھاد سے لدے 4 جہاز لنگر انداز ہوئے، جو مجموعی طور پر ایک لاکھ 8 ہزار 277 میٹرک ٹن کھاد لے کر پہنچے۔ کھاد کی بڑی کھیپ کی آمد کراچی پورٹ ٹرسٹ کی عملی استعداد اور بندرگاہ پر جاری سرگرمیوں کی عکاس ہے۔تفصیلات کے مطابق جہاز ایچ ایس ایل میکسیکو 9 ہزار 277 میٹرک ٹن پوٹاش کھاد لے کر پہنچا، جبکہ ہیپی فاؤنڈر، ایکسن آدم اور زونگ چانگ ہونگ شینگ بالترتیب 5 ہزار، 44 ہزار اور 50 ہزار میٹرک ٹن ڈی اے پی کھاد لے کر آئے۔ جہاز ہیپی فاؤنڈر سامان اتارنے کے بعد 17 اکتوبر کی شام بندرگاہ سے فجیرہ روانہ ہوگیا۔کھاد کی ان کھیپوں کی آمد پاکستان کی زرعی ضروریات پوری کرنے کے لیے کراچی پورٹ کے اہم کردار کو اجاگر کرتی ہے۔ ڈی اے پی کھاد ربیع کی فصلوں کے لیے اہم زرعی مداخل میں شامل ہے، جبکہ اس کی بروقت ترسیل زرعی پیداوار میں اضافے اور غذائی تحفظ کے لیے معاون ثابت ہوتی ہے۔