جیب میں رکھا موبائل فون پھٹنے سے نوجوان ہلاک

نیودہلی(مانیٹرنگ ڈیسک)بھارتی ریاست اترپردیش کے ضلع مظفر نگر میں جیب میں رکھا موبائل فون پھٹنے کے
بعد موٹر سائیکل سے گرنے والے نوجوان کی دورانِ علاج موت ہو گئی۔بھارتی میڈیا رپورٹس کے مطابق یہ واقعہ پیر کی شام ضلع ہیڈکوارٹر سے تقریبا 25 کلومیٹر دور بھوپا پولیس اسٹیشن کی حدود میں رحمت پور گاں کے وہلنا چوک کے قریب پیش آیا۔متوفی کی شناخت وکاس کے نام سے ہوئی ہے، جو اتم شوگر مل میں ٹوکن مین کے طور پر کام کرتے تھے۔ اطلاعات کے مطابق ان کی قمیص کی جیب میں موجود موبائل فون اچانک زور دار آواز کے ساتھ پھٹ گیا، جس سے موٹر سائیکل پر ان کا توازن بگڑ گیا اور وہ سڑک پر گر پڑے۔ حادثے میں ان کے سر، سینے، ہاتھ اور جسم کے دیگر حصوں پر شدید چوٹیں آئیں۔وکاس کے والد رویندر نے بتایا کہ ان کا بیٹا اکلوتا تھا اور شادی شدہ تھا۔ اس کے دو بچے ہیں، جن میں چھ سالہ بیٹی درشٹی اور تین سالہ بیٹا شامل ہیں۔ والد کے مطابق وکاس پیر کو اپنی والدہ کو لے کر اپنے ماموں کے گھر گیا تھا۔ انہیں وہاں چھوڑنے کے بعد وہ شام کے وقت موٹر سائیکل پر گھر واپس جا رہا تھا کہ راستے میں یہ حادثہ پیش آ گیا۔واقعے کی اطلاع ملنے پر پولیس موقع پر پہنچی اور مقامی افراد کی مدد سے زخمی نوجوان کو اسپتال منتقل کیا گیا۔ اس کی حالت تشویش ناک ہونے پر ڈاکٹروں نے اسے دوسرے اسپتال لے جانے کا مشورہ دیا، تاہم منگل کی رات علاج کے دوران اس کی موت ہو گئی۔