وزیراعلیٰ پنجاب کے معاون خصوصی برائے پبلک پراسیکیوشن رانا بلال احمد کی زیرصدارت اجلاس

لاہور (کورٹ رپورٹر) وزیراعلیٰ پنجاب کے معاون خصوصی برائے پبلک پراسیکیوشن رانا بلال احمد کی زیرصدارت محکمہ پراسیکیوشن کی تنظیم نو اور انتظامی اصلاحات کے حوالے سے اجلاس ہوا، جس میں پراسیکیوشن کے نظام کو مزید موثر بنانے کے لیے مختلف تجاویز کا جائزہ لیا گیا۔ اجلاس میں کیس فلو مینجمنٹ سسٹم، پنجاب لیگل ایڈ ایجنسی، پراسیکیوٹرز کی تربیت اور انسپکشنز کے نظام پر تفصیلی بریفنگ دی گئی جبکہ پنجاب لیگل ایڈ ایجنسی اور پراسیکیوشن انسپکٹوریٹ سمیت مختلف اصلاحات پر غور کیا گیا۔ اجلاس میں عوام کی پراسیکیوشن سروسز تک آسان رسائی یقینی بنانے کے اقدامات کا بھی جائزہ لیا گیا۔ رانا بلال احمد نے کہا کہ وزیراعلیٰ مریم نواز شریف کے ویژن کے مطابق پراسیکیوشن نظام کی بہتری کے لیے اقدامات جاری ہیں، میرٹ پر مبنی پراسیکیوشن اور بروقت انصاف کی فراہمی حکومت کی اولین ترجیح ہے۔ انہوں نے ہدایت کی کہ انصاف کی بروقت فراہمی کے لیے تمام دستیاب وسائل بروئے کار لائے جائیں۔ اجلاس میں سیکرٹری پراسیکیوشن مسرت جبین، پراسیکیوٹر جنرل پنجاب عرفان تارڑ، ایڈیشنل سیکرٹری ایڈمن محمد اعظم اور دیگر متعلقہ افسران نے شرکت کی۔