پیپلزپارٹی وسطی پنجاب کے الائیڈ ونگز کی تنظیم نو کا آغاز، درخواستیں طلب

لاہور (این این آئی) پاکستان پیپلز پارٹی وسطیٰ پنجاب نے اپنے الائیڈ ونگز کی تنظیم نو کا عمل شروع کر دیا۔ اس سلسلے میں پارٹی کے جنرل سیکرٹری سید حسن مرتضیٰ نے پیپلز سٹوڈنٹس فیڈریشن اور پیپلز یوتھ وسطی پنجاب کے مختلف عہدوں کے لیے اہل رہنمائوں اور کارکنوں سے درخواستیں طلب کرلی ہیں۔ درخواستیں جمع کرانے کی آخری تاریخ 15 نومبر 2026ء مقرر کی گئی ہے جبکہ امیدواروں کو اپنی درخواستیں پیپلز سیکرٹریٹ ماڈل ٹائون میں جمع کرانا ہوں گی۔ اپنے ایک وڈیو پیغام میں جنرل سیکرٹری سید حسن مرتضیٰ نے بتایا کہ تنظیمی عہدوں کے لیے امیدواروں کا انتخاب میرٹ کی بنیاد پر کیا جائے گا اور منتخب امیدواروں کی حتمی فہرست پارٹی چیئرمین بلاول بھٹو زرداری کو پیش کی جائے گی۔ انہوں نے کہا کہ تنظیم نو کے ابتدائی مرحلے میں دونوں پارٹی ونگز کے صوبائی صدر، جنرل سیکرٹری اور انفارمیشن سیکرٹری کے عہدوں کے امیدواروں کے انٹرویوز کیے جائیں گے۔