پاکستان میں گریجوایٹس کی بیروزگاری معیشت کیلئے بڑا چیلنج، مدثر مسعود چوہدری

لاہور (این این آئی) پاکستان انڈسٹری اینڈ ٹریڈرز ایسوسی ایشن فرنٹ (پیاف) انجم نثار گروپ
کے رکن و سابقہ ایگزیکٹو کمیٹی ممبر لاہور چیمبر آف کامرس اینڈ انڈسٹری مدثر مسعود چوہدری نے پاکستان میں ہر تیسرا گریجوایٹ بیروزگار ہونے کے حوالے سے سامنے آنے والی رپورٹ پر تشویش کا اظہار کرتے ہوئے کہا ہے کہ پاکستان میں تعلیم یافتہ نوجوانوں کی بیروزگاری ملکی معیشت کے لیے ایک اہم چیلنج بنتی جا رہی ہے، تعلیم یافتہ نوجوانوں کی صلاحیتوں سے بھرپور استفادہ نہ کرنا قومی معیشت کے لیے نقصان دہ ثابت ہوسکتا ہے۔ اپنے بیان میں انہوں نے حکومت پر زور دیا ہے کہ صنعتی ترقی، سرمایہ کاری کے فروغ اور کاروباری سرگرمیوں میں اضافے کے ذریعے روزگار کے نئے مواقع پیدا کیے جائیں، تعلیمی نظام کو مارکیٹ کی ضروریات سے ہم آہنگ اور فنی و ڈیجیٹل تربیت کو فروغ دینا بھی ضروری ہے۔