این ایچ اے کا سالانہ آمدن بڑھا کر160 ارب روپے مقرر:عبدالعلیم خان

لاہور (سٹی رپورٹر) وفاقی وزیر مواصلات علیم خان نے کہا ہے کہ نیشنل ہائی وے اتھارٹی (این ایچ اے) کا سالانہ آمدن ہدف 66 ارب روپے سے بڑھا کر 160 ارب روپے مقرر کردیا گیا ہے، جبکہ اخراجات 50 ارب روپے تک محدود رکھے
جائیں گے تاکہ سڑکوں کے ترقیاتی منصوبے اپنے وسائل سے مکمل کیے جاسکیں۔ لاہور چیمبر آف کامرس اینڈ انڈسٹری میں اجلاس سے خطاب کرتے ہوئے علیم خان نے کہا کہ ٹول ٹیکس اور دیگر ذرائع سے حاصل ہونے والی اضافی آمدن نئی سڑکوں کی تعمیر اور موجودہ شاہراہوں کی بہتری پر خرچ کی جائے گی۔ انہوں نے بتایا کہ لاہور اور اسلام آباد کے درمیان فاصلہ 380 کلومیٹر سے کم کرکے 280 کلومیٹر کرنے کے منصوبے پر کام جاری ہے۔ اس منصوبے سے گوجرانوالہ، گجرات، لالہ موسی، کھاریاں اور جہلم کے لیے سفری سہولت بہتر ہوگی۔ سیالکوٹ موٹروے کو چار سے چھ لین تک توسیع دی جارہی ہے جس کے لیے این ایچ اے اپنے وسائل سے مزید 10 ارب روپے فراہم کرے گا۔ وفاقی وزیر کے مطابق لاہور، خیبر موٹروے منصوبہ 2027 میں مکمل کرنے کا ہدف ہے جس سے بلوچستان ایکسپریس وے سے دور دراز علاقوں تک رسائی بہتر ہوگی جبکہ صنعتی شعبے کو درپیش مالی مشکلات کے تناظر میں زیادہ شرح سود سے متاثرہ صنعت کاروں کے قرضوں کی تنظیمِ نو بھی ضروری ہے۔ دوسری جانب لاہور چیمبر آف کامرس اینڈ انڈسٹری کے صدر علی حسام اصغر نے مطالبہ کیا کہ ٹول ٹیکس میں اضافے سے پہلے چیمبرز آف کامرس سے مشاورت کی جائے اور کاروباری قوانین میں ضروری اصلاحات کی جائیں۔