پاکستان ریلوے کے 172 ناکارہ انجنوں کی بحالی کا منصوبہ تیار

کراچی (این این آئی) پاکستان ریلوے نے غیر فعال انجنوں کی بحالی کے لیے ہنگامی بنیادوں پر مرمت کا منصوبہ تیار کرلیا ہے، جس کے تحت آئندہ چار ماہ میں 36 انجنوں کو دوبارہ قابلِ استعمال بنانے کا امکان ہے۔ انجنوں کی بڑی تعداد غیر فعال ہونے کے باعث ریلوے کے آپریشنل نظام کو درپیش مشکلات کے پیش نظر سپیئر پارٹس کی فراہمی اور مرمت کے عمل کو تیز کرنے کی کوششیں جاری ہیں۔ ذرائع وزارتِ ریلوے کے مطابق پاکستان ریلوے کے پاس مختلف ماڈلز کے مجموعی طور پر 439 انجن موجود ہیں، جن میں سے 267 فعال جبکہ 172 غیر فعال ہیں۔ انجنوں کی بحالی کے لیے متعلقہ مینو فیکچررز سے رابطے کیے گئے ہیں تاکہ مرمت کے لیے درکار پرزوں کی فراہمی یقینی بنائی جاسکے۔ ذرائع نے بتایا کہ 69 انجنوں کی مرمت کے سلسلے میں متعلقہ مینوفیکچرر سے رابطہ کیا گیا ہے، جبکہ سپیئر پارٹس کی فراہمی کے حوالے سے بات چیت جاری ہے۔ منصوبے کے تحت مختلف ماڈلز کے انجن مرحلہ وار بحال کیے جائیں گے۔