نیتن یاہو الیکشن سے قبل ایران پر حملے کیلئے بے چین’ ٹرمپ کا انکار

لاہور ( ویب ڈیسک) اسرائیلی وزیرِاعظم نیتن یاہو نے مبینہ طور پر انتخابات سے پہلے ایران پر مشترکہ حملے کے لیے امریکی صدر ڈونلڈ ٹرمپ کو قائل کرنے کی کوشش کی تاہم ٹرمپ نے فوری کارروائی کی منظوری نہیں دی۔امریکی نشریاتی ادارے سی این این نے یہ دعویٰ اپنی خصوصی رپورٹ میں امریکی اور اسرائیلی ذرائع کے حوالے سے کیا ہے۔ رپورٹ میں کہا گیا ہے کہ اسرائیل گزشتہ ہفتے سے امریکا پر زور دے رہا تھا کہ وہ ایران کے خلاف ممکنہ حملوں کی حمایت کرے اور ضرورت پڑنے پر مشترکہ کارروائی میں بھی حصہ لے۔رپورٹ میں بتایا گیا ہے کہ امریکی صدر ٹرمپ اور اعلیٰ امریکی حکام نے اسرائیل کو انتظار کرنے کا کہا اور یہ اشارہ بھی دیا کہ مستقبل قریب میں ایران کے خلاف مشترکہ کارروائی پر اتفاق ہوسکتا ہے۔ رپورٹ کے مطابق امریکی فوج نے ایران کے خلاف بڑے حملوں کے منصوبے تیار کر رکھے ہیں اور صدر کی منظوری ملنے پر 96گھنٹوں کے اندر کارروائی شروع کرسکتی ہے۔امریکا کے ایرانی اہداف میں فوجی تنصیبات، جوہری مراکز اور اہم بنیادی ڈھانچہ شامل ہوسکتے ہیں تاہم ابھی یہ صرف منصوبہ بندی ہے، حملے کا حتمی اعلان نہیں کیا گیا۔اسرائیل میں آج الیکشن ہونے جا رہے ہیں اور نیتن یاہو اپنی کمزور پوزیشن کے باعث خواہش رکھتے ہیں کہ انتخابات سے قبل اگر ایران پر حملہ کردیا جائے توانہیں ہمدردی کی بنیاد پر ووٹ مل سکتے ہیں۔تاہم اسرائیلی وزیرِ دفاع اسرائیل کاٹز نے اس تاثر کو رد کرتے ہوئے کہا کہ ایران پر انتخابات سے پہلے حملے کے ارادے اور فوجی قیادت میں اختلافات کی خبریں بے بنیاد ہیں۔اسرائیلی فوج نے بھی کہا کہ اس کی توجہ الیکشن کی سیکیورٹی ذمہ داریوں پر ہے اور اس سے منسوب دیگر قیاس آرائیاں گمراہ کن ہیں۔امریکا کی جانب سے سی این این کی اس رپورٹ پر تاحال کوئی ردعمل سامنے نہیں آیا البتہ اسرائیلی وزیراعظم کے دفتر سے جاری بیان میں اس رپورٹ کو مسترد کردیا ہے۔ادھر نیتن یاہو کے الیکشن سے قبل ایران پر حملے کے منصوبہ پر موساد چیف اور سینئر افسران میں ٹھن گئی۔اسرائیلی اخبار ہاریتز کے مطابق موساد کے سربراہ گوفمین اپنے وزیراعظم نیتن یاہو کے الیکشن سے قبل ایران پر حملے کے حق میں ہیں لیکن خفیہ ایجنسی کے اعلیٰ حکام نے اس کی مخالفت کی۔اسرائیلی اخبار نے نام ظاہر نہ کرنے والے سینئر ذرائع کے حوالے سے بتایا کہ موساد کے اعلیٰ عہدیداروں نے ایران پر فوری حملے کے وقت اور اس کے اسرائیلی انتخابات پر ممکنہ اثرات کے بارے میں تحفظات ظاہر کیے ہیں۔رپورٹ کے مطابق بعض حکام نے یہ سوال بھی اٹھایا کہ آیا سیاسی مفادات کو قومی سلامتی کے معاملات کے ساتھ ملایا جارہا ہے۔موساد کے سربراہ رومن گوفمین اس سے قبل نیتن یاہو کے فوجی سیکریٹری کے طور پر بھی خدمات انجام دے چکے ہیں۔ وزیراعظم نے انھیں رواں سال جون میں موساد کا سربراہ مقرر کیا تھا۔دوسری جانب اسرائیلی وزیراعظم نیتن یاہو کے دفتر اور اسرائیلی وزیر دفاع نے اس نوعیت کی خبروں کو مسترد کرتے ہوئے بے بنیاد قرار دیا۔
نیتن یاہو