کراچی میں پولیس مقابلے، 2 مبینہ ڈاکو ہلاک، 8 زخمی حالت میں گرفتار

کراچی (این این آئی) شہر قائد کے مختلف علاقوں میں پولیس اور مبینہ ڈاکوؤں کے درمیان مقابلوں کے دوران 2 ملزمان ہلاک جبکہ 8 زخمی حالت میں گرفتار کرلیے گئے۔ زخمی ملزمان کو طبی امداد کے لیے مختلف اسپتالوں میں منتقل کردیا گیا۔ ریسکیو ذرائع کے مطابق گلبہار پولیس کا حاجی مرید گوٹھ میں مبینہ مقابلہ ہوا، جس کے دوران ایک ملزم زخمی حالت میں گرفتار کیا گیا۔ زخمی ملزم کی شناخت اسٹیفن مسیح کے نام سے ہوئی، جسے عباسی شہید اسپتال منتقل کردیا گیا۔ ملزم کے قبضے سے اسلحہ بھی برآمد ہوا۔ منگھوپیر پولیس اور شاہین فورس کا منگھوپیر روڈ پر رات گئے مسلح ملزمان سے مقابلہ ہوا۔ ایس ایس پی ویسٹ طارق الٰہی مستوئی کے مطابق دوطرفہ فائرنگ کے تبادلے کے بعد 2 زخمی ملزمان سمیت 3 افراد کو گرفتار کیا گیا۔ زخمی ملزمان کی شناخت کاشف ولد مشتاق اور نبیل ولد یوسف جبکہ تیسرے ملزم کی شناخت شبیر ولد سلیمان کے نام سے ہوئی۔ پولیس کے مطابق گرفتار ملزمان کے قبضے سے 3 غیر قانونی پستول، ایمونیشن، فائر کیے گئے خول اور نقدی برآمد ہوئی، جبکہ ان کے زیر استعمال 3 موٹر سائیکلیں بھی تحویل میں لے لی گئیں۔ زخمی ملزمان کو طبی امداد کے لیے اسپتال منتقل کیا گیا جبکہ شبیر کو تھانے منتقل کردیا گیا۔ پولیس گرفتار ملزمان کا مجرمانہ ریکارڈ بھی حاصل کررہی ہے۔