45ویں سالانہ ختم نبوت کانفرنس کی جھلکیاں

لاہور ( پ ر) شاہراہِ چناب نگر تا چنیوٹ کے دونوں اطراف شرکائے کانفرنس کی بڑی بڑی گاڑیاں رواں دواں نظر آتی رہیں۔ چنیوٹ اور چناب نگر کے نواحی علاقوں سے عشاقِ ختمِ نبوت موٹر سائیکلوں کی صورت میں پنڈال کی جانب گامزن رہے۔ ٭ کانفرنس کے دوران سیدالاحراروبانی مجلس تحفظ ختم نبوت امیرِ شریعت حضرت مولانا سید عطاء اللہ شاہ بخاری، مجاہدِ ملت حضرت مولانا محمد جالندھری اور دیگر اساطینِ علم و عزیمت کی تجدیدی، تحریکی اور تاریخ ساز خدمات کا تذکرہ خیر کیا گیا اور ان کی مساعیِ جمیلہ کو خراجِ تحسین پیش کیا گیا۔٭ پنڈال کے قریب بنوری پارک میں خطبہ جمعة المبارک اور نماز کی امامت کے فرائض خانقاہِ سراجیہ کندیاں کے سجادہ نشین حضرت مولانا خواجہ خلیل احمد نے انجام دیے۔ ٭ شیخ الاسلام مولانا مفتی محمد تقی عثمانی کی اسٹیج آمد پر مولانا اللہ وسایا نے خیر مقدمی کے کلمات ارشاد فرمائے ۔مولانا احمد حنیف جالندھری نے نعروں کی گونج میں شیخ الاسلام کو کانفرنس سے خطاب کرنے کی دعوت دی ۔٭ مولانا مفتی محمد تقی عثمانی نے اپنی تقریر میں قادیانی کتب اور لٹریچر پر گرفت اور حوالہ جات کے حوالہ سے مجلس تحفظ ختم نبوت کے مولانا محمد حیات اور مولانا عبد الرحیم اشعر سے استفادہ کرنے کا تذکرہ کیا۔٭ حضرت مولانا حافظ حمداللہ کی اسٹیج پرآمد کے موقع پر نعروں کی گونج فضا میں ارتعاش پیدا کرتی رہی۔٭ 30 اکتوبر کی صبح جامعہ اسلامیہ باب العلوم کہروڑ پکا کے شیخ الحدیث حضرت مولانا منیر احمد منور نے اپنے مخصوص اور ممتاز اسلوب میں درسِ قرآن ارشاد فرمایا۔٭ کانفرنس کے حفاظتی انتظامات کی ذمہ داری دارالقرآن فیصل آباد کے حضرت مولانا غلام فرید، قاری عزیز الرحمن رحیمی، مولانامحمدعمار اور رضاکارانِ ختمِ نبوت مانسہرہ نے سنبھالی ہوئی تھی۔ متعلقہ رضاکار مستعدی، نظم و ضبط اور احساسِ ذمہ داری کے ساتھ اپنے فرائضِ منصبی ادا کرتے رہے۔٭ کانفرنس میں مشہور و معروف ثنا ء خوان مولاناشاہد عمران عارفی ، فیصل بلال حسان ، مولانا قاسم گجر، رانا عثمان قصوری ، قاری محمدواصف ، امین برادران اور دیگر نعت خوان حضرات بارگاہ رسالت میں ہدیہ تبریک پیش کرتے رہے۔٭ بعض مقررین نے فتنہ قادیانیت سے متعلق معاصر صورتِ حال پر گفتگو کی، جب کہ حرمین الشریفین کے تحفظ، مظلومانِ فلسطین کے مصائب و آلام اور ان کے ساتھ اظہارِ یکجہتی اور سعودی عرب پر حوثیوں کے حملوں کو بھی اپنے خطابات کا حصہ بنایا۔پنڈال میں شہدائے فلسطین کے لیے دعائے مغفرت و بلندیِ درجات کا سلسلہ جاری رہا۔٭ کانفرنس کی صحافتی کوریج کے لیے میڈیا سیل سے وابستہ مولانا عبدالحکیم نعمانی، مولانا عبدالنعیم ،مولانا محمد عرفان بزیزی اور نے اپنے رفقا کے ہمراہ ابلاغی ذمہ داریاں نبھائیں اور کانفرنس کی سرگرمیوں کو قارئین و ناظرین تک پہنچانے کا اہتمام کیا۔٭ کانفرنس کی کارروائی کو انٹرنیٹ اور سوشل میڈیا پر مولانا مہتاب فاروق کی نگرانی میں نشر کیا جاتا رہا۔ اندرونِ ملک اور بیرونِ ملک سے ہزاروں سامعین نے براہِ راست نشریات کے ذریعے خطابات سماعت کیے اور اجتماع کی کارروائی سے باخبر رہے۔٭ ماہنامہ لولاک ملتان اور ہفت روزہ ختمِ نبوت کراچی کے سالانہ خریدار بننے کے لیے شرکائے کانفرنس قائم کردہ دفتر میں رقوم جمع کراتے رہے۔ اس موقع پر دینی صحافت کے فروغ اور مطالعہ کتب و رسائل کی اہمیت بھی نمایاں رہی۔٭ معروف شعرا اور نعت خوانوں نے بارگاہِ رسالت مآب ۖ میں منظوم نذران عقیدت پیش کیے۔ سامعین پر کیف و سرور کی کیفیت طاری رہی اور درود و سلام، نعروں اور نعتیہ کلام سے کانفرنس کا ماحول معطر ہوتا رہا۔٭ کانفرنس کے مختلف اجزا، علمی خطابات، اکابر کے تذکرے، دعائیہ کلمات، نعتیہ محافل اور انتظامی سرگرمیوں کا مرکزی محور تحفظِ ختمِ نبوت کا پیغام رہا۔ اجتماع نے شرکا کو دینی تعلیمات سے وابستگی، علمی شعور اور پُرامن و آئینی جدوجہد کی اہمیت کی یاد دہانی کرائی۔
جھلکیاں