آرمینیا کی پارلیمنٹ میں ہنگامہ آرائی،کرسیاں پھینکنے کا تبادلہ اور متعدد ارکان زخمی

یروآن (این این آئی) آرمینیا کی پارلیمنٹ میں جمعرات کو حکومتی اور حزب اختلاف کے ارکان
کے درمیان ہاتھا پائی، کرسیاں پھینکنے اور میزیں الٹنے کے واقعات پیش آئے، جن میں متعدد ارکان زخمی ہوئے اور سکیورٹی اہلکاروں کو مداخلت کرنا پڑی۔ رواں ماہ اس نوعیت کا یہ دوسرا واقعہ ہے۔ جھگڑا وزیراعظم نکول پاشینیان کی جماعت سول کنٹریکٹ اور حزب اختلاف کے اتحاد مضبوط آرمینیا کے ارکان کے درمیان سرکاری اخراجات کی نگرانی کرنے والے ادارے آڈٹ چیمبر کے ایک عہدیدار کی تقرری پر بحث کے دوران شروع ہوا۔ حکمران جماعت کے رکن تارون شاخویان نے حزب اختلاف کی جانب سے بدعنوانی کے الزامات کے جواب میں اپوزیشن اتحاد کے سربراہ ناریک کاراپیتیان کے خاندان کا ذکر کیا اور ان کے ایک رشتے دار کے بیان پر تنقید کی۔ اس پر کاراپیتیان نے جواب دیا اور بحث ذاتی حملوں میں بدل گئی۔ کچھ ہی دیر میں دونوں جانب کے ارکان ایک دوسرے کو دھکے دینے اور مارنے لگے۔ وڈیو میں پارلیمنٹ کے نائب سربراہ واہاگن الکسانیان کو حزب اختلاف کے ارکان کی طرف کرسی پھینکتے جبکہ شاخویان کو اپوزیشن رکن گارنک داوتیان پر پانی انڈیلتے دیکھا گیا۔