قومی کھیل کی بحالی کا مشن نیشنل انڈر 15 سکولز ہاکی ڈوہلمیٹ پروگرام کی منظوری

ملتان ( نامہ نگار خصوصی) وفاقی حکومت نے ملک بھر میں قومی کھیل کی بحالی اور گراس روٹ لیول
سے نیا ٹیلنٹ سامنے لانے کے لیے "نیشنل انڈرـ15 سکولز ہاکی ڈویلپمنٹ پروگرام اور سکولز ہاکی لیگ” کی باقاعدہ منظوری دے دی۔ہاکی پورٹل پر ایک لاکھ نیو ٹیلنٹ ہاکی پلیئرز کی رجسٹریشن کا ہدف مقرر کیا گیا ہے۔ابتدائی طور پر 16 ہزار سرکاری و پرائیویٹ سکولز پروگرام کے لئے رجسٹرڈ کر لئے گئے۔اس جامع پروگرام کا بنیادی مقصد سکولوں کو ہاکی کا مرکز بنانا اور مستقبل کی انڈرـ18 اور انڈرـ21 قومی ٹیموں کے لیے باصلاحیت کھلاڑی تیار کرنا ہے۔ذرائع کے مطابق سکولز ہاکی لیگ کے مقابلے ملک گیر سطح پر مختلف مراحل میں منعقد کیے جائیں گے، جن میں چاروں صوبوں سمیت آزاد کشمیر، گلگت بلتستان اور اسلام آباد کے سکولز حصہ لیں گے۔تحصیل، ضلعی اور ڈویژنل مقابلے 15 نومبر 2026 سے شروع ہوں گے۔ صوبائی راؤنڈ جنوری 2027 میں منعقد کیا جائے گا۔ قومی (نیشنل) راؤنڈ فروری 2027 میں کھیلا جائے گا۔کھلاڑیوں کی حوصلہ افزائی کے لیے پاکستان ہاکی فیڈریشن نے بھاری انعامات اور ایک سال تک کے ماہانہ وظیفوں کا اعلان کیا ہے پہلی پوزیشن (فاتح ٹیم) کھلاڑیوں کو 10,000 روپے ماہانہ وظیفہ ملے گا اور فاتح سکول ٹیم کو 30 لاکھ روپے کا نقد انعام دیا جائے گا۔ دوسری پوزیشن (رنرز اپ) کھلاڑیوں کو 7,500 روپے ماہانہ وظیفہ ملے گا اور سکول ٹیم کو 20 لاکھ روپے نقد ملیں گے۔تیسری پوزیشن: کھلاڑیوں کو 5,000 روپے ماہانہ وظیفہ ملے گا اور سکول ٹیم کو 10 لاکھ روپے نقد ملیں گے۔گراس روٹ سطح پر وسائل کی کمی کو دور کرنے کے لیے فیڈریشن نے ہدف مقرر کیا ہے کہ پہلے مرحلے میں پاکستان بھر کے 1,000 سکولوں کو مفت اور جدید ہاکی کٹس اور آلات فراہم کیے جائیں گے۔ 30 روزہ تربیتی کیمپ: لیگ کے باقاعدہ مقابلوں سے قبل منتخب سکولوں کے طلبہ کو کوالیفائیڈ کوچز کی نگرانی میں 30 دن کی بنیادی ہاکی اور فٹنس ٹریننگ دی جائے گی۔ ہر سال 100 لڑکوں اور 100 لڑکیوں کو خصوصی سمر کیمپس کے لیے منتخب کیا جائے گا، جہاں انہیں اعلیٰ معیار کی کوچنگ، فٹنس ٹریننگ اور تعلیمی معاونت دی جائے گی۔لیگ کی فاتح ٹیم اور نمایاں کارکردگی دکھانے والے منتخب کھلاڑیوں کو بین الاقوامی دوروں پر بھیجا جائے گا تاکہ انہیں عالمی سطح کا تجربہ حاصل ہو سکے۔
ہاکی