تحصیل شالامار میں پیرا فورس بھینسوں کے باڑے ہٹانے میں ناکام سیوریج کا نظام تباہ،

لاہور (محمد کامران سے) تحصیل شالامار میں پیرا فورس بھینسوں کے باڑے ہٹانے میں ناکام، گندگی اور سیوریج کا نظام تباہ، وزیراعلی پنجاب کے صاف ستھرا شہر ویژن کو دھچکا وزیراعلی پنجاب مریم نواز شریف کے ”صاف ستھرا پنجاب، خوبصورت شہر” کے ویژن کے برعکس تحصیل شالامار کے مختلف علاقوں میں غیر قانونی بھینسوں کے باڑوں اور سڑکوں پر آزادانہ گھومنے والے مویشیوں کے باعث صفائی کی صورتحال انتہائی ابتر ہو چکی ہے۔ شہریوں کا کہنا ہے کہ پیرا فورس بھینسوں کے باڑے ہٹانے میں بری طرح ناکام دکھائی دے رہی ہے جس کے نتیجے میں داروغہ والا، شادی پورہ، شریف پورہ، شیلر چوک، جمشید ٹائون، پیر شیشیاں، لکھوڈیر، اقبال کالونی، چائنہ سکیم اور بھوگیوال سمیت متعدد علاقوں میں بھینسوں کا مٹر گشت معمول بن چکا ہے۔ مقامی افراد کے مطابق باڑوں سے نکلنے والا گوبر اور گندا پانی سڑکوں اور گلی محلوں میں جمع رہتا ہے جس سے سیوریج کا نظام درہم برہم ہو چکا ہے۔ تعفن، آلودگی اور مچھروں کی بھرمار کے باعث شہری شدید اذیت میں مبتلا ہیں جبکہ ڈینگی اور دیگر وبائی امراض کے پھیلنے کے خدشات بھی بڑھتے جارہے ہیں۔ کئی مقامات پر پیدل چلنا بھی دشوار ہو گیا ہے اور بارش کے بعد صورتحال مزید خراب ہو جاتی ہے۔ شہریوں کا کہنا ہے کہ اگر وزیراعلی پنجاب کے صاف ستھرا شہر کے ویژن کو حقیقت کا روپ دینا ہے تو غیر قانونی بھینسوں کے باڑوں، سڑکوں پر مویشی چھوڑنے والوں اور صفائی کے نظام میں رکاوٹ بننے والے عناصر کے خلاف بلاامتیاز کارروائی ناگزیر ہے۔ اہل علاقہ نے ضلعی انتظامیہ، بلدیہ عظمیٰ لاہور اور متعلقہ اداروں سے مطالبہ کیا ہے کہ فوری آپریشن کرتے ہوئے غیر قانونی باڑے ختم کئے جائیں، مویشیوں کو رہائشی آبادیوں سے منتقل کیا جائے، سیوریج کا نظام بحال کیا جائے اور ذمہ دار افراد کے خلاف سخت قانونی کارروائی عمل میں لائی جائے تاکہ شہریوں کو صاف، محفوظ اور صحت مند ماحول میسر آسکے۔