راولپنڈی(خصوصی رپورٹر)انسداد دہشت گردی راولپنڈی کی خصوصی عدالت نے دھماکہ خیز مواد برآمدگی کے مقدمہ میں نامزد ملزم کو جرم ثابت ہونے پر 5 سال قید بامشقت اور تمام جائیداد ضبط کرنے کا حکم دیا ہے جبکہ نفرت انگیز مواد برآمدگی کے مقدمہ میں نامزد ملزم کو الزام ثابت ہونے پر 4 سال قید بامشقت اور 10 لاکھ روپے جرمانے کی سزا سنادی ہے سی ٹی ڈی پولیس نے 20 ستمبر 2024 کو کالعدم تنظیم داعش کے مبینہ رکن منظور احمد کو ساگری موڑ جی ٹی روڈ سے گرفتار کر کے انسداد دہشت گردی ایکٹ کے دفعہ 7 اے ٹی اے اور ایکسپلوزو ایکٹ 1908 کی دفعہ 4/5 کے تحت مقدمہ درج کیا تھا جس میں ملزم پر بارودی مواد، سیفٹی فیوز وائر اور ڈیٹونیٹر برآمدگی کا الزام تھا گزشتہ روز ٹرائل مکمل ہونے پر عدالت نے ملزم کو 5 سال قید بامشقت کی سزا سنانے کے ساتھ تمام جائیداد بحق سرکار ضبط کرنے کا حکم دیا ہے ادھر سی ٹی ڈی پولیس نے یکم اگست 2024 کو کالعدم تنظیم اہل سنت والجماعت کے مبینہ رکن سیف اللہ کو راولپنڈی سے گرفتار کر کے انسداد دہشت گردی ایکٹ کی دفعہ 11 ڈبلیو اور 11 جی کے تحت مقدمہ درج کیا تھا ملزم پر نفرت انگیز مواد اور کالعدم تنظیم کے جھنڈے و بیج برآمدگی کا الزام تھا گزشتہ روز ٹرائل مکمل ہونے پر عدالت نے ملزم کو 4 سال قید بامشقت اور 10 لاکھ روپے جرمانے کی سزا سنادی عدم ادائیگی جرمانہ کی صورت میں ملزم کو 6 ماہ مزید قید بھگتنا ہوگی عدالت نے دونوں ملزمان کو ضابطہ فوجداری کی دفعہ 382 بی کا فائدہ بھی دیا ہے جس کے تحت دونوں کا عرصہ حوالات سزا سے منہا تصور ہوگا۔
