لاہور (نیوز ایجنسیاں )پنجاب میں گنے کے کرشنگ سیزن کا آغاز ہوگیا ۔صوبائی حکومت نے اتوار کے روز سے گنے کے کرشنگ سیزن کے آغاز کا نوٹیفکیشن جاری کردیا۔نوٹیفکیشن کے مطابق پنجاب کی تمام شوگر ملز گنے کی خریداری کریں گی جبکہ شوگر ملز گنے کا ریٹ مارکیٹ فورسز میکنیزم کے تحت جاری کریں گی۔ ذرائع کے مطابق رواں سال پنجاب میں 24لاکھ 52ہزار ایکڑ پر گنا کاشت کیا گیا ہے جبکہ رواں سال کی کاشت گزشتہ سال کی نسبت 16فیصد زیادہ ہے۔صوبے کی مجموعی 47شوگر ملز میں سے 41فعال ہیں، جب کہ گنے کی قیمت کا تعین شوگر ملز مارکیٹ فورسز کے طریقہ کار کے تحت کریں گی۔ پنجاب فوڈ سیفٹی اینڈ کنزیومر پروٹیکشن ڈیپارٹمنٹ کے مطابق کسانوں کے حقوق کا تحفظ یقینی بنایا جائے گا۔ دوسری جانب شوگر ملز ایسوسی ایشن نارتھ زون نے اچانک جاری کیے گئے نوٹیفکیشن پر تحفظات کا اظہار کرتے ہوئے کہا ہے کہ ملوں کے گوداموں میں 13لاکھ ٹن اضافی چینی موجود ہے اور موجودہ ذخائر کی موجودگی میں کرشنگ سیزن شروع کرنا ممکن نہیں۔گورنر پنجاب کی منظوری کے بعد محکمہ کی جانب سے کرشنگ سیزن کے آغاز کا نوٹیفکیشن جاری کیا گیا ہے، جس کے تحت صوبے کی تمام شوگر ملز کو 15 نومبر سے گنے کی خریداری شروع کرنے کی ہدایت کی گئی ۔ ملوں کو مکمل طور پر فعال کرنے کے لیے کم از کم 15 دن درکار ہوتے ہیں۔ایسوسی ایشن کے مطابق بوائلرز اور بھاری مشینری کو دوبارہ چلانے کے لیے تقریبا دو ہفتے کی تیاری ضروری ہے، جب کہ حکومت نے رات 9 بجے نوٹیفکیشن جاری کر کے اگلے ہی دن سے کرشنگ شروع کرنے کا حکم دے دیا، جس پر فوری عمل درآمد ملوں کے لیے ممکن نہیں۔ اعلامیے کے مطابق غیر فروخت شدہ چینی کے ذخائر کے باعث ملیں پہلے ہی اربوں روپے مارک اپ اور ٹیکسوں کی مد میں ادا کر چکی ہیں۔شوگر ملز ایسوسی ایشن کا کہنا ہے کہ اضافی چینی کے ذخائر ختم ہونے تک نئے کرشنگ سیزن کا آغاز ممکن نہیں۔ ایسوسی ایشن نے حکومت سے مطالبہ کیا ہے کہ سرپلس چینی کی فوری برآمد کی اجازت دی جائے، غلط اعداد و شمار فراہم کرنے والے سرکاری افسران کا احتساب کیا جائے اور شوگر سیکٹر کو مکمل طور پر ڈی ریگولیٹ کیا جائے۔
کرشنگ
