روینہ ٹنڈن کو دنگل گرل زائرہ وسیم کونا شکرا کہنے پر پچھتاوے کا احساس ہونے لگا

ممبئی(ویب ڈیسک )بالی ووڈ اداکارہ روینہ ٹنڈن کو دنگل گرل زائرہ وسیم کونا شکرا کہنے پر پچھتاوے کا احساس ہونے لگا جس کے بعد انہوں نے اپنی ٹوئٹ ڈیلیٹ کردی۔فلم ”سیکریٹ سپر اسٹار“ اور”دنگل“ سے شہرت حاصل کرنے والی اداکارہ زائرہ وسیم کے مذہب کی خاطر بالی ووڈ چھوڑنے کے اعلان نے پورے بالی ووڈ میں ہلچل مچادی ہے اورہرکوئی اس معاملے پر اپنی رائے کا اظہار کررہا ہے۔تاہم اداکارہ روینہ ٹنڈن وہ پہلی شخصیت تھیں جنہوں نے زائرہ کے فیصلے پر ردعمل دیتے ہوئے انہیں ناشکرا قراردیا تھا اورکافی سخت لہجے میں کہا تھا اس سے کوئی فرق نہیں پڑتا کہ صرف دو فلمیں کرنے والی اداکارہ اس انڈسٹری کوچھوڑرہی ہے جس نے اسے سب کچھ دیا۔ میں صرف یہی کہہ سکتی ہوں کہ اگرجانا ہے تو باوقار طریقے سے جائیں اور اپنے تنگ نظر خیالات اپنے تک ہی محدود رکھیں۔لیکن اب روینہ ٹنڈن کواپنے الفاظوں کی سختی کا اندازہ ہوگیا، جس کے بعد انہوں نے اپنے فوری ردعمل پر پچھتاوے کا اظہار کرتے ہوئے کہا ہے کہ زائرہ کا فیصلہ ہم جیسے لوگوں کے لیے ناقابل قبول ہے جو فلموں، سینما اورانڈسٹری سے محبت کرتے ہیں۔ میں اپنی پہلی ٹوئٹ ڈیلیٹ کررہی ہوں جس میں نہایت سخت الفاظ استعمال کیے گئے تھے۔واضح رہے کہ 18 سالہ اداکارہ زائرہ وسیم نے اپنی طویل فیس بک پوسٹ میں لکھا تھا کہ فلم انڈسٹری میں کام کرنے کی وجہ سے ان کا ایمان خطرے میں پڑرہا ہے اور وہ بہت خاموشی سے اپنے مذہب سے دورہوتی جارہی ہیں لہٰذا وہ بالی ووڈ سے کنارہ کشی اختیار کررہی ہیں۔