نیویارک ، روم ، میونخ ، لندن ،پیرس (نیٹ نیوز) عالمی وبا کرونا وائرس کے سبب دنیا بھر میں 2 لاکھ 7 ہزار افراد لقمہ اجل بن گئے جبکہ 29 لاکھ 95 ہزار سے زائد افراد متاثر ہو چکے ہیں۔دنیا بھر میں کرونا سے متاثرہ افراد میں سے 8 لاکھ 78 ہزار 955 صحت یاب بھی ہو چکے ہیں۔امریکہ میں کورنا وائرس سے مزید 1157 افراد موت کے منہ میں چلے گئے جس کے بعد امریکہ میں اموات کی تعداد 55 ہزار سے تجاوز کر گئی ہیں۔امریکہ میں متاثرہ افراد کی تعداد 9 لاکھ 85 ہزار سے زائد ہو گئی جبکہ صحتیاب ہونے والوں کی تعداد ایک لاکھ 18 ہزار 700 سے زائد ہے۔اسپین میں بھی گزشتہ 24 گھنٹے کے دوران مزید 288 افراد کی اموات کے بعد اب تک ہلاک ہونے والے افراد کی تعداد 23 ہزار سے تجاوز کر گئی اور متاثرہ افراد کی تعداد 2 لاکھ 26 ہزار سے بڑھ گئی ہے۔اٹلی میں کرونا وائرس نے مزید 260 افراد کی جان لے لی جہاں اب تک ہونے والی اموات 26 ہزار سے زائد ہو گئیں۔فرانس میں بھی کرونا نے مزید 242 افراد کی جان لے لی۔ فرانس میں مرنے والوں کی تعداد 22 ہزار 800 سے بڑھ گئیں اور متاثرہ افراد کی تعداد ایک لاکھ 97 ہزار سے تجاوز کر گئی۔جرمنی میں بھی کرونا سے اموات کا سلسلہ جاری ہے جہاں گذشتہ 24 گھنٹے کے دوران مزید 19 افراد جان کی بازی ہار گئے اور اب تک ہونے والی اموات کی تعداد 5 ہزار 800 سے بڑھ گئیں۔برطانیہ میں کرونا سے مزید 413 افراد کی موت کے بعد اب تک مرنے والوں کی تعداد 20 ہزار 700 سے تجاوز کر گئی جبکہ متاثرہ افراد کی تعداد ایک لاکھ باون ہزار سے زائد ہے۔ترکی میں بھی کرونا کے وار جاری ہیں۔ گذشتہ 24 گھنٹے کے دوران مزید 99 افراد موت کے منہ میں چلے گئے جس کے بعد اموات کی تعداد 2 ہزار 800 سے تجاوز کر گئی۔ایران میں کرونا سے اب تک 90 ہزار481 افراد متاثر ہوئے اور ہلاکتوں کی تعداد 5 ہزار 700 سے بڑھ گئی۔
