لاہور (سپیشل رپورٹر)وزیراعلیٰ عثمان بزدار کی زیرصدارت صوبائی اپیکس کمیٹی کا اجلاس ایوان وزیر اعلیٰ میں ہوا ،کور کمانڈر لاہور لیفٹیننٹ جنرل محمد عبدالعزیز ،جنرل آفیسر کمانڈنگ 10 ڈویژن میجر جنرل محمد انیق الرحمن ملک، ڈی جی رینجرز پنجاب میجر جنرل محمد عامر مجید، صوبائی وزیر قانون راجہ بشارت اور اعلیٰ سول و عسکری حکام نے اجلاس میں شرکت کی ۔اجلاس میں کورونا کی چوتھی لہر سے نمٹنے کیلئے کئے جانے والے اقدامات کا جائزہ لیا گیا،اجلاس میں محرم الحرام کے دوران امن و امان برقرار رکھنے کیلئے انتظامات پر بھی غور کیا گیا۔
اجلاس میں صوبے کے زیادہ سے زیادہ شہریوں کی کورونا ویکسی نیشن کے عمل کو مزید تیز کرنے پر اتفاق کیا گیا ، اجلاس میں کئے گئے فیصلوں پر عملدرآمد کیلئے مشترکہ حکمت عملی کے تحت موثر اقدامات اٹھائے جائیں گے ۔کورونا سے نمٹنے کیلئے عسکری قیادت کی جانب سے حکومت کے ساتھ ہر ممکن تعاون جاری رکھنے کے عزم کا اعادہ کیا گیا ۔ کور کمانڈر لاہور لیفٹیننٹ جنرل محمد عبدالعزیز نے کورونا کی چوتھی لہر پر قابو پانے کیلئے سول حکومت کی معاونت جاری رکھنے کی یقین دہانی کرائی ۔وزیراعلیٰ نے کہا کہ پاک فوج مشکل وقت میں ہمیشہ قوم کے شانہ بشانہ کھڑی رہی ہے ۔کورونا کی چوتھی لہر پر قابو پانے کیلئے ہر ضروری اقدام پہلے بھی اٹھایا ہے اور آئندہ بھی اٹھائیں گے ۔
صوبائی اپیکس کمیٹی میں کہا گیا کہ محرم الحرام کے دوران امن و امان کی فضا برقرار رکھنے کیلئے جامع پلان پر من و عن عملدرآمد کیا جائے گا۔محرم الحرام کے دوران بھائی چارے اورمذہبی ہم آہنگی کے فروغ کیلئے ہر ممکن اقدام اٹھایا جائے گا ،مساجد، امام بارگاہوں اور دیگر عبادت گاہوں پر پولیس کی اضافی نفری تعینات کی جائے گی،اسلحہ کی نمائش پر پابندی کے قانون پر بھی موثر انداز میں عملدرآمد کرایا جائے گا ۔
وزیراعلیٰ سے وزیراعظم کے معاون خصوصی برائے مصالحت وہم آہنگی بلوچستان نوابزادہ شاہ زین بگٹی نے ملاقات کی ،بزدار نے کہا کہ پنجاب اوربلوچستان یک جان دوقالب ہیں،میرچاکر اعظم رندکے مقبرے پر سیاحوں کے لئے سٹیٹ آف دی آرٹ سہولیات فراہم کریں گے ،حکومت پنجاب نے تربت میں ہسپتال کی تعمیر کیلئے خطیر فنڈزمختص کیے ہیں،بلوچستان کے عوام کے لئے صحت کی مزید سہولتیں بھی فراہم کریں گے ،ترقی کے سفر میں پنجاب بلوچستان کو ساتھ لے کر چلے گا۔ادھر وزیراعلیٰ کے حکم پر رحیم یار خان کے نواحی علاقے بھونگ میں مندر میں توڑ پھوڑ کرنے والے شرپسند عناصر کے خلاف ایکشن لے کر پولیس نے 50 سے زائد حملہ آوروں کو گرفتار کر لیا،عثمان بزدار نے کہا قانون شکنی کرنے والوں کے خلاف آہنی ہاتھوں سے نمٹا جائے گا ۔پاکستان میں اقلیتوں کو یکساں حقوق حاصل ہیں ،اقلیتوں کے حقوق کا ہر قیمت پر تحفظ کریں گے ۔
