عثمان بزدار کا کہنا ہے کہ پنجاب وہ پہلا صوبہ ہے جہاں ائیر ایمبولینس سروسز کا منصوبہ منظور کیا گیا ہے۔
تفصیلات کے مطابق وزیراعلیٰ پنجاب سردار عثمان بزدار نے 467 ریسکیورز کی پاسنگ آوٹ تقریب سے خطاب کرتے ہوئے کہا ہے کہ میں خیبر پختونخواہ سے آنیوالے مہمانوں کو خوش آمدید کہتا ہوں اور ریسکیو کیڈیٹس کوخصوصی تربیت اور جنوبی ایشیاء کی معروف ایمرجنسی سروس کا حصہ بننے پر مبارکباد پیش کرتا ہوں،393 کیڈیٹس خیبر پختونخواہ جبکہ 74 کوہ سلیمان کے کیڈیٹس پاس آوٹ ہو رہے ہیں، امید کرتا ہوں بڑے شہروں کی طرح یہ کیڈیٹس خیبر پختون خواہ اور کوہ سلیمان میں بھی اپنی خدمات سرانجام دیں گے۔
انھوں نے کہا ہے کہ پنجاب ایمرجنسی سروسز نے 96 لاکھ سے زائد متاثرین کو ریسکیو کیا ہے، پاکستان تحریک انصاف کی حکومت نے پنجاب کی 86 تحصیلوں تک سروسز کے دائرہ کار کو بڑھنے کےلئے نئی ایمبولینسز دیں ہیں اس کے علاوہ ہم نے 27 اضلاع میں موٹر بائیک ریسکیو سروسز کو پہنچائی ہے۔
وزیراعلیٰ پنجاب نے مزید کہا ہے کہ پنجاب پولیس کی طرز پر بنیادی تنخواہ کے برابر رسک الاونس کے بارے میں بھی دلی ہمدردی سے غوروفکر کیا جائیگا، پنجاب وہ پہلا صوبہ ہے جہاں ائیر ایمبولینس سروسز کا منصوبہ منظور کیا گیا ہے اور آئندہ بجٹ میں اس کا فنڈ بھی منظور ہو جائیگا۔
