کابل ، لندن ، نیویارک اوٹاوہ ، ، ماسکو ، تہران (نیٹ نیوز) پاکستان، ترکی اور روس کا سفارتخانے بند نہ کرنے کا اعلان کیا ہے۔ غیر ملکی خبر ایجنسی کے مطابق روسی حکام کا کہنا تھا کہ کہ طالبان نے روسی سفارتخانے کے تحفظ کی یقین دہانی کروائی ہے۔
ترکی نے بھی افغانستان میں اپنا سفارتخانہ بند نہ کرنے کا اعلان کرتے ہوئے سفارتی مشن جاری رکھنے کا اعلان کیا ہے۔
پاکستانی وزارت خارجہ کے ترجمان نے بھی اس بات کی تصدیق کی ہے کہ کابل میں پاکستانی سفارتخانہ اپنا مشن جاری رکھے ہوئے ہیں اور پاکستانی سفارتخانہ افغانستان سے غیرملکیوں کے انخلا میں بھی معاونت کر رہا ہے۔
گزشتہ روز بھی افغانستان سے دو خصوصی پروازیں بڑی تعداد میں غیرملکیوں کو لیکر پاکستان پہنچی تھیں جس میں افغان حکام بھی شامل تھے جبکہ آج بھی پی آئی اے کا خصوصی آپریشن جاری رہے گا۔
خیال رہے کہ افغان طالبان کے سیاسی دفتر کے ترجمان محمد نعیم نے عرب میڈیا کو انٹرویو دیتے ہوئے کہا کہ ہم عالمی برادری کے ساتھ مل کر چلنا چاہتے ہیں اور یقین دلاتے ہیں کہ افغانستان میں غیر ملکی مشنز پر کسی قسم کے حملے نہیں ہوں گے۔
