لاہور ميں گریٹر اقبال پارک میں خاتون پر حملہ اور ہراساں کرنے کے معاملے میں پوليس نے مختلف علاقوں ميں کارروائیاں کرتے ہوئے 35افراد کو حراست ميں لے ليا۔
پولیس کی جانب سے راوی روڈ، بادامی باغ، لاری اڈہ اور شفیق آباد میں چھاپے مارے گئے۔
پولیس کے مطابق 20افراد کو پوچھ گچھ کے بعد چھوڑ دیا گیا لیکن علاقے سے باہر نہ جانے کا پابند کیا گیا جبکہ 15افراد سے پولیس حراست میں تفتیش جاری ہے۔
زیر حراست افراد کی 14اگست کے روز موبائل لوکیشن چیک کی جائے گی جبکہ وقوعہ کی ویڈیوز اور تصاویر سے چہرے کا موازنہ بھی کیا جا رہا ہے۔
واقعہ کی گریٹر اقبال پارک کے کلوز سرکٹ کیمروں کی فوٹیجز بھی منظرعام پر آگئی ہے۔ فوٹیجز کے مطابق خاتون کے گرد ہجوم شام ڈھلنے سے پہلے جمع ہوا جبکہ ہراساں کرنے کا واقعہ اندھیرا ہونے تک جاری رہا اور اس دوران ایک بھی پولیس اہلکار موقع پر دکھائی نہ دیا۔
پولیس کی تفتیشی ٹیم کا کہنا ہے کہ جلد حتمی ملزمان کا تعین کرلیا جائے گا جبکہ پولیس کی غفلت جاننے کے لیے انکوائری کمیٹی نے کام شروع کر دیا ہے۔
کمشنر لاہور اور سی سی پی او نے متاثرہ خاتون سے ملاقات کرکے جلد انصاف کی يقين دہانی بھی کرائی ہے۔
گزشتہ روز خاتون پر حملہ اور ہراساں کرنے پر 400 نامعلوم افراد کے خلاف مقدمہ تھانہ لاری اڈہ میں درج کیا گیا۔ مقدمے میں دفعہ 354 اے، 382، 149 اور 147 شامل کی گئیں۔
ایف آئی آر کے مطابق ملزمان نے اس سے 15ہزار روپے، موبائل فون اور زیورات بھی چھین لیے۔ پوليس کا کہنا ہے کہ فوٹیج کی مدد سے ملزمان کی شناخت کا عمل جاری ہے۔
خاتون کی جانب سے درج کروائی گئی ایف آئی آر میں لکھا ہے کہ 14اگست کی شام ساڑھے 6بجے خاتون اپنے ساتھی کے ساتھ اقبال پارک میں مینار کے قریب یوٹیوب ویڈیو بنا رہی تھی اچانک وہاں موجود 300 سے 400 افراد کا ہجوم ہم پر چڑھ دوڑا۔
مقدمے کے متن کے مطابق اسی دوران لوگ خاتون کے ساتھ کھینچا تانی کر رہے تھے یہاں تک خاتون کے کپڑے تک پھاڑ دیے۔ کافی لوگوں نے خاتون کی مدد کی کوشش کی لیکن ہجوم بہت زیادہ تھا جبکہ کچھ لوگ خاتون کو اٹھا کر ہوا میں اچھالتے رہے۔
واضح رہے کہ سوشل میڈیا پر وائرل ویڈیوز میں دیکھا گیا ہے کہ لوگوں کو ہجوم خاتون پر حملہ اور ہراساں کر رہا ہے اور اسی دوران ہجوم اچانک ہی خاتون کو گھیر لیتا ہے۔
