لاہور : این ایل ای ٹیسٹ کے خلاف لاہور میں کلمہ چوک پر ڈاکٹرز نے احتجاج کیا۔
این ایل ای امتحان کیخلاف میڈیکل کے طلباء اور ینگ ڈاکٹرز سڑکوں پر نکل آئے۔ مظاہرین نے کلمہ چوک پر احتجاج کرتے ہوئے برکت مارکیٹ روڈ کو ٹریفک کیلئے بند کر دیا۔ مظاہرین نے امتحانی مراکز میں داخل ہونے کی کوشش کی تو پولیس نے مظاہرین پر لاٹھی چارج شروع کر دیا۔
پولیس کی جانب سے مظاہرین پر آنسو گیس کی شیلنگ بھی کی گئی جس سے متعدد ڈاکٹرز زخمی جبکہ 15 سے زائد مظاہرین کی طبیعت خراب ہو گئی۔
مظاہرین کا کہنا ہے کہ پرامن احتجاج کیلئے آئے تھے جو ہمارا حق ہے۔
ادھر احتجاج کے باعث شہریوں کو بھی شدید مشکلات کا سامنا رہا۔ سڑکوں پر گاڑیوں کی لمبی قطاریں لگی رہیں۔
بعدازاں صورتحال خراب ہونے پر مظاہرین نے احتجاج ختم کر دیا ان کا کہنا تھا کہ پنجاب بھر میں اوپی ڈیز بند کر دینگے۔
