لاہور: (ویب ڈیسک) آسٹریلیا کے خلاف تیسرے ٹیسٹ میچ میں قومی ٹیم کے آل راؤنڈر حسن علی کے آؤٹ ہونے پر کینگروز فیلڈر ڈیوڈ وارنر نے ان کے انداز میں جشن منایا جس کی ویڈیو سوشل میڈیا پر وائرل ہو گئی ہے۔
لاہور ٹیسٹ میں آسٹریلیا نے پاکستان کو شکست دے کر سیریز اپنے نام کرلی، آسٹریلیا نے کھیل کے چوتھےروز اپنی دوسری اننگز 227 رنز 3 کھلاڑی آؤٹ پر ڈیکلیئر کردی تھی جس کے بعد پاکستان کو جیت کیلئے 351 رنز کا ہدف ملا تھا لیکن قومی ٹیم کھیل کے آخری روز 235 پر ہی ڈھیر ہوگئی۔
آسٹریلیا نے پاکستان کو 115 رنز سے شکست دے کر سیریز اپنے نام کی، امام الحق 70 اور کپتان بابر اعظم 55 رنز کے ساتھ نمایاں رہے۔
دوسری اننگز میں حسن علی جب نیتھن لیون کی گیند پر بولڈ ہوئے تو قریب ہی کھڑے ڈیوڈ وارنر نے حسن علی کے جنریٹر اسٹائل میں جشن منایا جس کی ویڈیو سوشل میڈیا پر بھی وائرل ہو رہی ہے۔
یاد رہے کہ حسن علی آسٹریلیا کے خلاف دوسری اننگز میں 13 رنز بنا کر آؤٹ ہوئے تھے۔
