لزبن: (ویب ڈیسک) عالمی شہرت یافتہ فٹبالر کرسٹیانو رونالڈو اور اُن کی گرل فرینڈ جارجینا روڈریگیز نوزائیدہ بیٹے کی موت کے بعد سوشل میڈیا پر خاندان کے ہمراہ پہلی تصویر شیئر کردی۔
سماجی رابطے کی سائٹ انسٹاگرام پر پرتگال کی فٹبال ٹیم کے کپتان کرسٹیانو رونالڈو نے گرل فرینڈ کے ہمراہ پوسٹ شیئر کی جس میں انہوں نے لکھا کہ وہ اپنی نوزائیدہ بیٹی کے ساتھ گھر واپس آگئے ہیں جبکہ نیک خواہشات پر مداحوں کے شکر گزار ہیں۔
اسٹار فٹبالر نے فیملی فوٹو کے ساتھ کیپشن میں لکھا کہ جیو (جارجیا) اور نومولود بیٹی بلآخر گھر آگئے، آپ کا تعاون بہت ضروری ہے جبکہ اب وقت آگیا ہے کہ ہم اس ننھی مہمان کے لیے شکر گزار ہوں جس کا ہم نے اس دنیا میں خیرمقدم کیا ہے۔
اس سے قبل گزشتہ دنوں رونالڈو کے جڑواں بچوں میں سے ایک نومولود بیٹا انتقال کرگیا تھا۔ جس پر رونالڈو نے مداحوں کو آگاہ کرتے ہوئے لکھا تھا کہ یہ سب سے بڑا درد ہے جسے کوئی بھی والدین محسوس کر سکتے ہیں۔
