چنیوٹ(ویب ڈیسک)چنیوٹ میں دہشت گردی کی واردات ناکام بنا دی گئی ، مشکوک شخص سے دھماکہ خیز مواد برآمد کرلیا گیا ، تفتیش کیلئے نامعلوم مقام پر منتقل کردیا گیا ۔تفصیلات کے مطابق دریائے چناب کے قریبی علاقے میں سی ٹی ڈی پولیس نے خفیہ اطلاع ملنے پر چھاپہ مارا جس دوران دو مشکوک افراد کو حراست میں لیا گیا جن میں سے ایک کو تفتیش کے بعد رہا کردیا گیا جبکہ دوسرے شخص سے تفتیش جاری ہے ۔پولیس ذرائع کا کہنا ہے کہ جس مکان پر چھاپہ مارا گیا وہاں سے چار الیکٹرونک ڈیٹونیٹر، دھماکہ خیزمواد اور دہشت گردی کی واردات میں استعمال ہونیوالے دیگر مواد برآمد کرلیا گیا ۔پولیس ذرائع کے مطابق چنیوٹ میں تخریب کاری کی منصوبہ بندی کی جارہی تھی تاہم بروقت کارروائی کے باعث چنیوٹ دہشت گردی سے بچ گیا ۔
