لاہور (کرائم رپورٹر) سانحہ چیئرنگ کراس میں اہم پیش رفت، گرفتار سہولت کار کی نشاندہی پر سرکلر روڈ سے مزید 4سہولت کار گرفتار ، ہینڈ گرنیڈ، دھماکہ خیز اور خودکش جیکٹ بنانے والا مواد بر آمد، تفتیش کیلئے نامعلوم مقام پر منتقل کر دیا گیا۔ ذرائع کے مطابق کاﺅنٹر ٹیراریزم ڈیپارٹمنٹ نے سانحہ چیئرنگ کراس میں ملوس سہولت کار انوار الحق کی نشاندہی پر سرکلر روڈ پر چھاپہ مار کر مزید 4دہشتگردوں کو گرفتار کر لیا ہے۔گرفتار ملزمان میں عرفان خان، عطاالرحمن، عبداللہ اور عمران شاہ شامل ہیں۔ سی ٹی ڈی ذرائع کے مطابق ملزمان کے قبضہ سے ہینڈ گرنیڈ، نقشے اور وہ دھماکہ خیز مواد دیگر اجزا کے ساتھ بر آمد ہوا ہے جو خودکش جیکٹ بنانے میں کام آتا ہے۔ سی ٹی ڈی نے ملزمان کو مزید تفتیش کیلئے نامعلوم مقام پر منتقل کردیا ہے جہاں ان سے تفتیش جاری ہے۔
