مقبوضہ کشمیر:اسمبلی کا پہلا روز ریاستی حیثیت کی بحالی کے مطالبے پر ہنگامہ آرائی کی نذر

سرینگر (این این آئی) غیرقانونی طورپر بھارت کے زیر قبضہ جموں و کشمیر میں قانون ساز اسمبلی کے اجلاس کا پہلا روز آج اس وقت ہنگامہ آرائی کی نذرہوگیا جب حکمران نیشنل کانفرنس کے ارکان نے ریاستی حیثیت کی بحالی کے مطالبے کے حق میں نعرے لگائے جبکہ بھارتیہ جنتا پارٹی کے ارکان نے اس کے خلاف احتجاج کیا۔ کشمیر میڈیا سروس کے مطابق صبح10 بجے اجلاس شروع ہونے کے فورا بعد نیشنل کانفرنس کے ارکان نے جن میں علی محمد ساگر بھی شامل تھے، مقبوضہ جموں و کشمیر کی ریاستی حیثیت بحال کرنے کے مطالبے کے حق میں نعرے لگائے۔ کمیونسٹ پارٹی آف انڈیا’ مارکسسٹ (CPI-M) کے رکن اسمبلی محمد یوسف تاریگامی نے کہا کہ منتخب حکومت کو اقتدار سنبھالے دو برس گزر چکے ہیں لیکن ریاستی حیثیت بحال نہیں کی گئی۔ اس مطالبے پر بی جے پی کے ارکان نے احتجاج شروع کردیا، جو پلے کارڈز اٹھا کر کھڑے ہوگئے اور بھارت ماتا کی جے سمیت مختلف نعرے لگائے۔