لاہور چیمبر انتخابات کا پولنگ وینیو تبدیل کرنیکی درخواست پر فریقین کو نوٹس جاری

لاہور (کورٹ رپورٹر) لاہور ہائیکورٹ کے جسٹس اسد باجوہ نے لاہور چیمبر آف کامرس کے انتخابات کا پولنگ وینیو تبدیل کرنے کی درخواست پر فریقین کو نوٹس جاری کرتے ہوئے سماعت 22 ستمبر تک ملتوی کر دی۔ درخواست میں موقف اپنایا گیا کہ موجودہ پولنگ مقام پر ووٹرز کی گنجائش ناکافی ہے،19 ہزار 87 ایسوسی ایٹ کلاس ووٹرز کے لیے موجودہ پولنگ انتظامات ناکافی ہیں، پولنگ بوتھ کی تعداد25 سے بڑھا کر کم از کم 40 کرنے کے باوجود موجودہ مقام کی گنجائش کا مسئلہ حل نہیں ہوتا، فلیٹی ہوٹل انتظامیہ نے49 ہزار500 مربع فٹ کورڈ جگہ اور7 داخلی و خارجی راستوں کی پیشکش کی، فلیٹی ہوٹل ایل سی سی آئی دفتر سے تقریبا5 منٹ کی مسافت پر ہے، الیکشن کمیشن کی غیرجانبداری پر ریگولیٹر نے خود تحفظات ظاہر کئے، موجودہ پولنگ مقام پر ایک مرکزی گیٹ، 106 امیدواروں اور چار پینلز کے باعث رش و سکیورٹی مسائل کا خدشہ ہے، استدعا ہے کہ الیکشن کمیشن تحلیل کرکے آزاد، غیرجانبدار اور غیر سیاسی افراد پر مشتمل نیا کمیشن بنایا جائے۔ عدالت 16 ستمبر کا ریگولیٹر کا فیصلہ کالعدم قرار دینے اور 23،24 ستمبر کو ایل سی سی آئی دفتر میں پولنگ روکنے کا حکم دے۔