ڈے کیئر سینٹرز کو قانونی دائرے میں لانیکا فیصلہ، قانون سازی کی یقین دہانی

لاہور (این این آئی) کمسن بچوں کی نگہداشت کے لئے قائم ڈے کیئر سینٹرز کو قانونی دائرے میں لانے کا فیصلہ کرلیا گیا، سیکرٹری ویمن ڈویلپمنٹ ثمن رائے نے قائمہ کمیٹی برائے ویمن ڈویلپمنٹ کو یقین دہانی کرائی ہے کہ ڈے کیئر سینٹرز کے حوالے سے باقاعدہ قانونی فریم ورک تشکیل دینے کے لئے قانون سازی کی جائے گی اور اس کا مسودہ جلد تیار کرنے کی کوشش کی جائے گی۔ قائمہ کمیٹی کے اجلاس میں چیف وہپ مسلم لیگ (ن) رانا ارشد نے استفسار کیا کہ کیا وفاق کی طرح پنجاب میں بھی ڈے کیئر سینٹرز کے حوالے سے کوئی قانون موجود ہے؟ سیکرٹری ویمن ڈویلپمنٹ ثمن رائے نے بتایا کہ فی الحال پنجاب میں ڈے کیئر سینٹرز وزیراعلیٰ کے اقدام کے تحت قائم کیے جا رہے ہیں۔ چیف وہپ رانا ارشد نے سوال کیا کہ کیا ادارے نے ڈے کیئر سینٹرز کو باقاعدہ قانونی دائرے میں لانے کے لئے کوئی تجویز زیر غور رکھی ہے، جس پر سیکرٹری ثمن رائے نے بتایا کہ فی الحال ایسی کوئی تجویز زیر غور نہیں تاہم اس پر کام کیا جاسکتا ہے۔ چیف وہپ رانا ارشد نے کہا کہ حکومت اور وزیراعلیٰ کے اقدامات قابل تحسین ہیں تاہم قانونی فریم ورک سے اس منصوبے کو مستقل بنیادوں پر تحفظ حاصل ہوگا۔ کمیٹی ارکان نے کہا کہ باقاعدہ قانون بننے سے یہ بھی واضح ہو جائے گا کہ کن اداروں کیلئے ڈے کیئر سینٹرز کا قیام ضروری ہوگا اور ان کے حوالے سے ذمہ داریوں کا تعین بھی کیا جاسکے گا۔ سیکرٹری ویمن ڈویلپمنٹ ثمن رائے نے کمیٹی کی تجویز سے اتفاق کرتے ہوئے کہا کہ یہ اچھی تجویز ہے، اس حوالے سے ڈرافٹ جلد تیار کرکے کمیٹی کے سامنے پیش کیا جائے گا۔ انہوں نے یقین دہانی کرائی کہ کمیٹی کی تجویز پر عملدرآمد کیا جائے گا اور اس معاملے پر پہلی فرصت میں اجلاس منعقد کرکے قانون سازی کا عمل آگے بڑھایا جائے گا۔