لانگ مارچ ہر صورت ہو گا ،اسلام آباد آنے سے کوئی نہیں روک سکتا سہیل آفریدی

پشاور،اسلام آباد (وقا ئع نگار خصوصی) وزیراعلیٰ خیبر پختونخوا سہیل آفریدی نے کہا ہے کہ احتجاج ہمارا حق ہے،27ستمبر کو پوری قوت کے ساتھ نکلیں گے۔چیئرمین پی ٹی آئی بیرسٹر گوہر کا کہنا ہے کہ ہمیں پرامن رہنے کی سزا دی جارہی ہے، 5اراکین قومی اسمبلی اور ایک وزیر گرفتار ہیں۔ جبکہ سینیٹ میں اپوزیشن لیڈر علامہ ناصر عباس نے کہا ہے کہ مذاکرات کیلئے تیار ہیں، وزیراعظم سیاسی رہنماؤں کی کمیٹی بنائیں۔ وزیراعلیٰ خیبر پختونخوا سہیل آفریدی نے کہا ہے کہ احتجاج ہمارا حق ہے،27ستمبر کو پوری قوت کے ساتھ نکلیں گے۔پشاور میں پریس کانفرنس کرتے ہوئے سہیل آفریدی کا کہنا تھا کہ تحریک انصاف کے ساتھ سوتیلی ماں جیسا سلوک کیا جا رہا ہے، پرامن احتجاج کی آئین اور قانون اجازت دیتا ہے۔انہوں نے کہا کہ 27ستمبر کو پوری قوت کے ساتھ نکلیں گے اور اتنی بڑی تعداد میں لوگ باہر آئیں گے جس کا مخالفین تصور بھی نہیں کرسکتے۔وزیراعلیٰ خیبر پختونخوا کا کہنا تھا کہ کسی قسم کا خوف نہیں، ہر صورت لانگ مارچ ہوگا، جبکہ 25ستمبر کو احتجاج کا تمام پلان ڈسکلوز کردیا جائے گا، یہ ٹیسٹ میچ ہے اورہم ہی جیتیں گے۔سہیل آفریدی نے کہا کہ ہمارا تصادم کا کوئی ارادہ نہیں، ہم پرامن اور جمہوری طریقے سے انصاف کے لیے آواز اٹھا رہے ہیں۔ان کا کہنا تھا کہ اگر گولی چلائی گئی تو پھر دوسری طرف سے بھی گولی چلے گی، موجودہ صورتِ حال ملک کو خانہ جنگی کی طرف لے جانے کی کوشش ہے۔وزیراعلیٰ خیبرپختونخوا نے وزیر داخلہ کی پریس کانفرنس کی مذمت کرتے ہوئے کہا کہ ہم کوئی دہشت گرد نہیں، بندوق کا مقابلہ بندوق سے نہیں کر رہے بلکہ اپنے آئینی اور جمہوری حق کے لیے آواز اٹھا رہے ہیں۔سہیل آفریدی کا مزید کہنا تھا کہ جوانوں کا مقابلہ بندوق سے نہیں کیا جا رہا، تحریک انصاف انصاف کے حصول کے لیے پرامن سیاسی جدوجہد کر رہی ہے۔ وزیراعلیٰ خیبر پختونخوا سہیل آفریدی نے انتشاری سیاست کا الزام مسترد کردیا۔انہوں نے کہا کہ ہم نے تمام آئینی اور سیاسی آپشنز کا استعمال کیا جب کوئی شنوائی نہیں ہوئی تو لانگ مارچ کا اعلان کیا۔دریں اثناء اپوزیشن لیڈر سینیٹ علامہ راجہ ناصر عباس کا کہنا ہے کہ ہم مذاکرات کے لیے تیار ہیں، وزیراعظم سیاسی رہنماؤں کی کمیٹی بنائیں، حکومت اور اپوزیشن کی مذاکراتی ٹیمیں تشکیل دی جائیں۔اسلام آباد میں میڈیا سے گفتگو کرتے ہوئے سینیٹر علامہ راجہ ناصر عباس نے کہا کہ دونوں جانب سے سیاسی کمیٹیاں بیٹھیں تو معاملات کا حل نکل سکتا ہے، سیاسی لوگ بیٹھیں گے تو مشکلات اور مسائل کا حل نکل آئے گا۔علامہ راجہ ناصر عباس نے کہا کہ حکومت آج یا جب بیٹھنا چاہے ہماری جانب سے مذاکرات کے دروازے کھلے ہیں، بڑے بڑے دنیا کے مسائل مذاکرات کی میز پر حل ہوجاتے ہیں۔سینیٹ میں اپوزیشن لیڈر نے کہا کہ با اختیار اور فیصلہ کرنے والے لوگ بیٹھیں تو مسائل کا حل نکل سکتا ہے، ملک کو بحران سے نکالنے کیلئے با معنی مذاکرات ہونے چاہئیں، وزیراعظم ٹیم بنائیں سیاسی لوگ بیٹھیں اور ان مسائل کا حل نکالیں۔ادھر پاکستان تحریک انصاف کے چیئرمین بیرسٹر گوہر نے کہا ہے کہ احتجاج اور مارچ ہمارا آئینی حق ہے، پی ٹی آئی کے 5 اراکین قومی اسمبلی جبکہ ایک صوبائی وزیر کو گرفتار کیا گیا ہے۔نجی ٹی وی کے مطابق چیئرمین پی ٹی آئی بیرسٹر گوہرنے پشاور میں بات کرتے ہوئے کہا کہ تحریک انصاف جمہوری پارٹی ہے، ہم پرامن ہیں پرامن رپیں گے اور اس کی ہی سزا دی جارہی ہے۔بیرسٹر گوہر نے کہا کہ ریاست کو اپنا طرز عمل بدلنا ہوگا، ملک کے لیے سوچیں، تحریک انصاف کے دور میں 12 لانگ مارچ ہوئے کسی کا راستہ نہیں روکا، دو سالوں سے ہمیں لانگ مارچ کرنے نہیں دیا جارہا، کیا احتجاج کرنا ہمارا جمہوری آئینی حق نہیں ہے۔پی ٹی آئی چیئرمین نے کہا کہ پانچ ایم این اے اور خیبرپختونخوا میں ایک وزیر گرفتار ہے، خیبرپختونخوا میں حکومت تحریک انصاف کی ہے لیکن سکہ کسی اور کا چلتا ہے، ہم اسلام آباد کو سومنات بنانے فتح کرنے نہیں جارہے بلکہ پرامن رہیں گے۔انہوں نے کہا کہ جب ہم اسلام آباد جائیں گے آئین و قانون کی بالادستی ہوگی، کیا ہم دہشت گرد ہیں ہمیں کہا جارہا ہے دہشت گرد کی طرح نمٹیں گے، ہم سیاسی لوگ ہیں دہشت گردوں کی طرح نہیں آئیں گے۔بیرسٹر گوہر نے کہا کہ ہم نے تعلقات ختم نہیں کیے رابطے ابھی بھی ہیں اور ہمارا مطالبہ ہے عمران خان کا علاج، کیسوں کی سماعت اور ملاقات کی اجازت ہے۔
سہیل آفریدی